बुलढाणा-लाईव्ह ट्रेंड्स न्यूज प्रतिनिधी । शेतकऱ्यांच्या सरसकट कर्जमुक्तीच्या मागणीसाठी शेतकरी नेते रविकांत तुपकर यांनी बुलढाणा येथे अन्नत्याग आंदोलनाला सुरुवात केली आहे. सरकारने जाहीर केलेली कर्जमाफी ही फसवी असून जाचक अटींमुळे बहुतांश शेतकरी या योजनेपासून वंचित राहणार असल्याचा आरोप करत तुपकर यांनी हे आंदोलन सुरू केले आहे. “एक तर सरकार जाईल नाहीतर आम्ही शेतकरी जाऊ”, असा इशारा त्यांनी सरकारला दिला आहे.
महाराष्ट्रातील शेतकरी मोठ्या आर्थिक संकटातून जात असून मोठ्या प्रमाणात शेतकरी आत्महत्या करत आहेत. शेतीमालाला योग्य भाव न मिळाल्यामुळे शेतकऱ्यांवर कर्जाचा डोंगर उभा राहिला आहे. त्यामुळे शेतकऱ्यांचे कर्ज फेडण्याची जबाबदारी सरकारची असल्याचे रविकांत तुपकर यांनी आंदोलनाच्या वेळी सांगितले. यापूर्वी शेतकरी नेत्यांनी नागपूर येथे आंदोलन केले असताना सरकारकडून 30 जूनपर्यंत कर्जमाफी करण्याचे आश्वासन देण्यात आले होते. मात्र, प्रत्यक्षात जाहीर करण्यात आलेल्या कर्जमाफी योजनेमध्ये अनेक जाचक अटी टाकण्यात आल्या असून ही कर्जमुक्ती नसून शेतकऱ्यांची दिशाभूल असल्याची टीका तुपकर यांनी केली. सरकारने जाहीर केलेल्या कर्जमाफीच्या अटींमुळे राज्यातील केवळ 10 ते 15 टक्के शेतकरीच पात्र ठरतील, असा दावा त्यांनी केला. सर्व शेतकऱ्यांना कोणत्याही अटीशिवाय सरसकट कर्जमुक्ती मिळावी, ही प्रमुख मागणी घेऊन हे आंदोलन सुरू करण्यात आले आहे. “आम्हाला फसवे शासन निर्णय आणि फसवी कर्जमुक्ती नको आहे. शेतकऱ्यांना खऱ्या अर्थाने दिलासा देण्यासाठी सरकारने सरसकट कर्जमाफी करावी,” अशी भूमिका रविकांत तुपकर यांनी मांडली. जोपर्यंत शेतकऱ्यांना संपूर्ण कर्जमुक्ती मिळत नाही, तोपर्यंत अन्नत्याग आंदोलन सुरूच ठेवणार असल्याचा निर्धार त्यांनी व्यक्त केला.
आंदोलनादरम्यान त्यांनी आपल्या जीवाची पर्वा न करता शेतकऱ्यांच्या प्रश्नांसाठी संघर्ष सुरू ठेवणार असल्याचे सांगितले. “या आंदोलनात माझा प्राण गेला तरी चालेल, मात्र शेतकऱ्यांच्या न्याय्य मागण्यांपासून मागे हटणार नाही,” असे भावनिक वक्तव्य त्यांनी केले. रविकांत तुपकर यांच्या अन्नत्याग आंदोलनामुळे राज्यातील शेतकरी प्रश्न पुन्हा एकदा ऐरणीवर आला असून या आंदोलनाचे पडसाद महाराष्ट्राच्या राजकीय आणि सामाजिक क्षेत्रात उमटण्याची शक्यता आहे. सरकार या आंदोलनावर काय भूमिका घेते, याकडे शेतकरी वर्गाचे लक्ष लागले आहे.
