मुंबई-लाईव्ह ट्रेंडस न्यूज वृत्तसेवा । राज्यातील १७ स्थानिक स्वराज्य संस्था मतदारसंघांच्या विधान परिषद निवडणुकांसाठी राजकीय घडामोडींना वेग आला असून महायुती आणि महाविकास आघाडी यांच्यातील लढत अधिकच रंगतदार बनली आहे. मात्र उमेदवारी अर्ज छाननी, बंडखोरीची माघार आणि संख्याबळाच्या गणितांमुळे सहा महत्त्वाच्या मतदारसंघांमध्ये महायुतीचे पारडे स्पष्टपणे जड झाल्याचे चित्र दिसत आहे.
कोकण मतदारसंघात शिवसेना आमदार महेंद्र दळवी यांच्या कन्या जुईली दळवी यांनी अपक्ष उमेदवारी अर्ज मागे घेतल्याने राष्ट्रवादी काँग्रेस (अजित पवार गट)चे उमेदवार अनिकेत तटकरे यांचा विजयाचा मार्ग मोकळा झाला आहे. महायुतीतील जागावाटपावरून निर्माण झालेला वाद मुख्यमंत्री एकनाथ शिंदे यांच्या मध्यस्थीने मिटल्याचे मानले जात आहे. अखेरच्या क्षणी झालेल्या या तडजोडीमुळे महायुतीतील संभाव्य बंडखोरीही टळली आहे.
सोलापूरमध्ये महाविकास आघाडीला मोठा धक्का बसला आहे. काँग्रेसचे उमेदवार आदित्य फत्तेपूरकर यांचा उमेदवारी अर्ज तांत्रिक कारणांमुळे बाद ठरला आहे. त्यामुळे महायुतीचे उमेदवार राजेंद्र राऊत यांचा विजय जवळपास निश्चित मानला जात आहे. सोलापूरमध्ये महायुतीकडे ६१४ पैकी ४२८ मतांचे भक्कम संख्याबळ आहे.
यवतमाळमध्ये महाविकास आघाडीचे अधिकृत उमेदवार साहेबराव कांबळे यांनी अपुऱ्या संख्याबळामुळे अर्ज मागे घेतला. या मतदारसंघातील एकूण ४४६ मतदारांपैकी मविआकडे केवळ १३१ मते असल्याने त्यांनी निवडणुकीतून माघार घेण्याचा निर्णय घेतला.
अमरावतीमध्ये महायुतीसमोर उभे राहिलेले भाजपचे बंडखोर उमेदवार विप्लव बजोरिया यांचा अर्ज छाननीदरम्यान बाद करण्यात आला. त्यामुळे महायुतीचे उमेदवार प्रवीण पोटे पाटील यांच्यासमोरील मोठा अडथळा दूर झाला आहे. येथे महायुतीकडे २२२ तर महाविकास आघाडीकडे १४८ मते आहेत.
नाशिकमध्ये महाविकास आघाडीने अधिकृत उमेदवारच न दिल्याने निवडणूक एकतर्फी होण्याची शक्यता वाढली आहे. महायुतीचे उमेदवार नरेंद्र दराडे यांना ६०३ पैकी ४५४ मतांचे मजबूत संख्याबळ लाभत असल्याने त्यांच्या विजयाची केवळ औपचारिकता बाकी असल्याचे राजकीय वर्तुळात बोलले जात आहे.
छत्रपती संभाजीनगर-जालना मतदारसंघातही महायुतीतील बंडखोरी शांत झाल्याचे दिसत आहे. शिवसेना नेते अब्दुल सत्तार यांचे पुत्र समीर सत्तार यांनी भरलेला अर्ज मागे घेणार असल्याची घोषणा स्वतः अब्दुल सत्तार यांनी केली आहे. महायुतीमध्ये ही जागा भाजपच्या वाट्याला गेल्याने सुहास शिरसाट हे अधिकृत उमेदवार आहेत. मुख्यमंत्री एकनाथ शिंदे यांच्या सूचनेनंतर समीर सत्तार माघार घेणार असल्याचे स्पष्ट करण्यात आले.
उमेदवारी अर्ज मागे घेण्याची अंतिम मुदत अद्याप बाकी असली तरी आतापर्यंतच्या घडामोडींवरून कोकण, सोलापूर, यवतमाळ, अमरावती, नाशिक आणि छत्रपती संभाजीनगर या सहा महत्त्वाच्या मतदारसंघांत महायुतीची बाजू भक्कम झाल्याचे दिसत आहे. त्यामुळे विधान परिषद निवडणुकीत महायुतीला मोठे यश मिळण्याची शक्यता अधिक बळकट झाली आहे.
