जळगाव-लाईव्ह ट्रेंड्स न्यूज प्रतिनिधी । शहरात विश्व हिंदू परिषद आणि बजरंग दलाच्या वतीने ‘कॉर्पोरेट जिहाद’ विरोधात आंदोलन करण्यात आले असून या माध्यमातून केंद्र सरकारकडे कठोर कारवाईची मागणी करण्यात आली आहे. आज बुधवार, २२ एप्रिल रोजी जिल्हाधिकारी कार्यालयासमोर झालेल्या या आंदोलनात कार्यकर्त्यांनी विविध मुद्द्यांवर आवाज उठवत राष्ट्रपतींना निवेदन सादर केले.
या आंदोलनादरम्यान जिल्हाधिकाऱ्यांमार्फत देशाचे राष्ट्रपती यांना निवेदन देण्यात आले. कार्यकर्त्यांनी देशात विविध स्तरांवर कथित जिहादी मानसिकतेशी संबंधित प्रकरणे समोर येत असल्याचा आरोप केला. विशेषतः कॉर्पोरेट क्षेत्रातही अशा प्रवृत्तींचा प्रभाव वाढत असल्याचा दावा करत याकडे गांभीर्याने लक्ष देण्याची गरज व्यक्त करण्यात आली.
निवेदनात नाशिकमधील टीसीएस कंपनीशी संबंधित प्रकरणाचा उल्लेख करण्यात आला असून, त्याद्वारे सुशिक्षित आणि व्यावसायिक क्षेत्रातही अशा प्रकारच्या घटनांची नोंद होत असल्याचे नमूद करण्यात आले. तसेच उत्तर प्रदेशातील काही प्रकरणांमध्ये हिंदू मुलींना लक्ष्य करून लैंगिक शोषण केल्याच्या घटनांचा संदर्भ देण्यात आला आहे. या घटनांमुळे समाजात भीती आणि अस्वस्थता निर्माण होत असल्याचे आंदोलनकर्त्यांचे म्हणणे आहे.
याशिवाय, अल फलाहा युनिव्हर्सिटीशी संबंधित कथित दहशतवादी कनेक्शनचा मुद्दा उपस्थित करत काही शैक्षणिक संस्थांबाबतही संशय व्यक्त करण्यात आला. देशातील विविध भागांमध्ये अवैध पद्धतीने ‘लँड जिहाद’च्या माध्यमातून अतिक्रमण होत असल्याचा आरोपही करण्यात आला असून, सार्वजनिक व सरकारी जमिनींचे संरक्षण करण्याची मागणी करण्यात आली आहे.
खानपानाशी संबंधित बाबींमध्येही काही गैरप्रकार घडत असल्याचा आरोप करत नागरिकांच्या धार्मिक भावना आणि आरोग्याशी खेळ केला जात असल्याची चिंता व्यक्त करण्यात आली. आंदोलनकर्त्यांच्या मते, या सर्व प्रकारांमुळे समाजात तणाव निर्माण होण्याची शक्यता असून प्रशासनाने वेळेत उपाययोजना करणे गरजेचे आहे.
बजरंग दलाने राष्ट्रहितासाठी सातत्याने काम करण्याची भूमिका पुन्हा अधोरेखित करत अशा कथित जिहादी प्रवृत्तींचा समूळ नाश करण्यासाठी कठोर पावले उचलण्याची मागणी केली आहे. या आंदोलनाद्वारे राष्ट्रपतींकडेही याबाबत तातडीने लक्ष देण्याची विनंती करण्यात आली आहे.
या वेळी जिल्हाध्यक्ष हरीश मुंदडा, विभाग मंत्री देवेंद्र भावसार, जिल्हा मंत्री राकेश लोहार, महानगर मंत्री किरण पराशर, हरीश कोल्हे, यश पांडे, विद्यार्थिनी आस्था पाटील यांसह इतर कार्यकर्ते मोठ्या संख्येने उपस्थित होते. आंदोलन शांततेत पार पडले असून प्रशासनाकडून यावर काय भूमिका घेतली जाणार याकडे सर्वांचे लक्ष लागले आहे.
