जळगाव लाईव्ह ट्रेंडस न्यूज प्रतिनिधी । जळगाव जिल्ह्यामध्ये वाढत्या मोटारसायकल चोरीच्या घटनांमुळे नागरिक हैराण झाले होते. या पार्श्वभूमीवर, पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांनी स्थानिक गुन्हे शाखेचे वरिष्ठ पोलीस निरीक्षक संदीप पाटील यांना याप्रकरणी कठोर कारवाईचे निर्देश दिले होते. त्यानुसार, पोलिसांनी तपास चक्रे फिरवत मोटारसायकल चोरीचा बनाव करणाऱ्या एका टोळीतील तीन जणांना जेरबंद केले आहे.
पोलिसांना गुप्त माहिती मिळाली की, अशोक हिरामण मोरे (रा. दगडी मनवेल, ता. यावल) याच्याकडे चोरीची मोटारसायकल आहे. या माहितीच्या आधारे, पोलीस पथकाने तातडीने कारवाई करत मोरेला ताब्यात घेतले. चौकशीदरम्यान, त्याने धक्कादायक खुलासा केला. सुमारे पाच वर्षांपूर्वी त्याने रावेर येथील जुने वाहन खरेदी-विक्री करणारा एजंट जफर शेख उस्मान (रा. जाम मोहल्ला, भुसावळ) याच्यामार्फत प्रमोद निलेश कोळी (रा. हुडको कॉलनी, भुसावळ) याच्याकडून १६ हजार रुपयांना एक मोटारसायकल विकत घेतली होती. या व्यवहारात जफर शेख उस्मानने कमिशन म्हणून २,००० रुपये घेतले होते.
या मोटारसायकलचे हप्ते बजाज फायनान्सकडे बाकी असल्याने, प्रमोद निलेश कोळीने ती मोटारसायकल चोरी झाल्याचा बनाव करून भुसावळ शहर पोलीस ठाण्यात तक्रार दाखल केली होती. या मोटारसायकलचा मूळ नंबर (MH १९ DK ०७५५) असताना, त्यांनी त्यावर (महाराष्ट्र १९ CC ६६४०) असा बनावट नंबर लावला होता. ३० डिसेंबर २०१९ रोजी भुसावळ शहर पोलीस ठाण्यात या चोरीसंदर्भात गुन्हा दाखल करण्यात आला होता.
या प्रकरणाच्या सखोल तपासणीत, आरोपींनी बजाज फायनान्स कंपनीची फसवणूक करण्याच्या उद्देशाने मोटारसायकल चोरीचा बनाव केल्याचे निष्पन्न झाले. पोलिसांनी अशोक हिरामण मोरे, जफर शेख उस्मान आणि प्रमोद निलेश कोळी या तिघांना ताब्यात घेतले असून, चोरीची मोटारसायकलही जप्त करण्यात आली आहे. पुढील कारवाईसाठी आरोपींना भुसावळ शहर पोलिसांच्या ताब्यात देण्यात आले आहे. ही यशस्वी कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते आणि वरिष्ठ पोलीस निरीक्षक संदीप पाटील यांच्या मार्गदर्शनाखाली पोहेकॉ प्रितमकुमार पाटील, यशवंत टहाकळे, पोकॉ बबन पाटील आणि प्रदीप सपकाळे यांनी केली.
