जळगाव-लाईव्ह ट्रेंड्स न्यूज प्रतिनिधी । जिल्ह्यातील आदिवासी भागांमध्ये कार्यरत असलेल्या क्षयरोग (टी.बी.) विभागातील कर्मचाऱ्यांसाठी दिलासादायक निर्णय घेण्यात आला आहे. काही महिन्यांपासून बंद झालेला दरमहा ₹१५०० इतका आदिवासी भत्ता आता पुन्हा सुरू करण्याचे आदेश जिल्हा परिषदेच्या मुख्य कार्यकारी अधिकारी सौ. मिनल करनवाल यांनी दिले आहेत. या निर्णयामुळे संबंधित कर्मचाऱ्यांमध्ये आनंदाचे वातावरण निर्माण झाले आहे.
टी.बी. विभागात कार्यरत सहा कर्मचाऱ्यांना आदिवासी भागातील सेवा बजावल्याबद्दल दरमहा १५०० रुपयांचा भत्ता देण्यात येत होता. मात्र, काही तांत्रिक कारणांमुळे मागील काही महिन्यांपासून हा भत्ता थांबवण्यात आला होता. यामुळे कर्मचारी नाराज होते आणि त्यांच्या मनोबलावर परिणाम होत होता.
ही बाब सौ. मिनल करनवाल यांच्या निदर्शनास आल्यानंतर त्यांनी तात्काळ याची गंभीर दखल घेतली. कर्मचारी हिताचा विचार करून, बंद करण्यात आलेला भत्ता पुन्हा सुरू करण्याचा निर्णय त्यांनी घेतला. यासंदर्भातील अधिकृत आदेशही संबंधित विभागाला निर्गमित करण्यात आले आहेत, त्यामुळे आता कर्मचाऱ्यांना नियमितपणे भत्ता मिळणार आहे.
मुख्य कार्यकारी अधिकारी सौ. करनवाल यांनी स्पष्ट केले की, “आदिवासी भागात काम करणारे कर्मचारी कठीण भौगोलिक व सामाजिक परिस्थितीतही जनतेच्या आरोग्यासाठी सेवा देतात. त्यांच्या या सेवेला मान्यता मिळणे आवश्यक आहे. त्यामुळे त्यांच्या मनोबलात वाढ होईल आणि ते अधिक उत्साहाने काम करतील, यासाठी हा भत्ता महत्त्वाचा आहे.”
या निर्णयामुळे टी.बी. विभागातील संबंधित कर्मचाऱ्यांमध्ये समाधान आणि कृतज्ञता व्यक्त होत आहे. त्यांनी या सकारात्मक निर्णयाबद्दल मुख्य कार्यकारी अधिकारी यांचे मनःपूर्वक आभार मानले आहेत. कर्मचारी हिताला सर्वोच्च प्राधान्य देणाऱ्या प्रशासनाच्या या भूमिकेचे सर्वत्र कौतुक होत आहे.
