यावल – लाईव्ह ट्रेंड्स न्यूज प्रतिनिधी । यावल ते शेळगावमार्गे जळगाव जोडणाऱ्या तापी नदीवरील पुलाच्या कामाचा वेग अत्यंत संथ असल्याने स्थानिक नागरीकांमध्ये तीव्र नाराजी व्यक्त होत आहे. दोन दशकांहून अधिक प्रतीक्षेनंतर शेळगाव बॅरेजचा प्रकल्प पूर्ण झाला असला, तरी या मार्गावरील पुलाचे काम अद्यापही अपूर्णच आहे. परिणामी, नागरिकांना प्रत्येक वर्षी पावसाळा संपल्यावर तात्पुरत्या हंगामी रस्त्याचा “वनवास” भोगावा लागत आहे.
यावल तालुक्यासह जळगाव आणि भुसावळ या भागांतील गावांना शेळगाव बॅरेज प्रकल्पामुळे हरित क्रांतीचे वरदान मिळाले आहे. तथापि, याच मार्गावर नागरी वाहतुकीसाठीचा कायमस्वरूपी पूल बांधण्याचे काम तीन वर्षांपूर्वी सुरू झाले असून, आजतागायत त्यात कोणतीही ठोस प्रगती दिसून आलेली नाही. या पुलाद्वारे जळगाव जिल्ह्याच्या प्रमुख बाजारपेठेपर्यंत सहज पोहोचता आले असते, परंतु कामाच्या कासवगतीमुळे जनजीवनावर थेट परिणाम होत आहे.
दरवर्षी पावसाळा संपल्यावर तापी नदीत तात्पुरता हंगामी रस्ता तयार करून प्रवास सुरू केला जातो. मात्र, या मार्गावरून वाहने चालवणे धोकादायक ठरते, तसेच शेतकरी आणि विद्यार्थ्यांना मोठ्या अडचणींचा सामना करावा लागतो. नागरिकांचे म्हणणे आहे की, प्रशासनाने या पुलाच्या कामासाठी आवश्यक निधी तातडीने उपलब्ध करून दिल्यास वाहतुकीची दीर्घ प्रतीक्षा संपुष्टात येईल आणि परिसरातील अर्थचक्रालाही गती मिळेल.
शेळगाव-जळगाव मार्गावरील हा पूल पूर्णत्वास गेल्यास, यावल तालुक्यातील नागरिकांना जिल्ह्याच्या मुख्य बाजारपेठेशी जोडणारा हा सर्वात महत्त्वाचा दुवा ठरणार आहे. मात्र, सध्याच्या परिस्थितीत कामाचा वेग पाहता नागरिकांचा संयम सुटू लागला असून, शासनाकडून ठोस हस्तक्षेप आणि जबाबदारीची मागणी वाढली आहे.
शेकडो नागरिकांनी शासनाकडे मागणी केली आहे की, या नागरी वाहतुकीसाठीच्या पुलाचे काम तातडीने पूर्ण करून जनतेचा हंगामी रस्त्यावरील वनवास समाप्त करावा आणि या महत्त्वाकांक्षी प्रकल्पाला गती द्यावी.
