मुक्ताईनगर -लाईव्ह ट्रेंड्स न्यूज प्रतिनिधी । चांगदेव आणि परिसरातील गावांमधील शेतकऱ्यांच्या प्रलंबित विद्युत समस्यांवरून आज शिवसेनेच्या वतीने महावितरण कार्यालयात ठिय्या आंदोलन करण्यात आले. ऐन पावसाळा तोंडावर असताना वीजपुरवठा, शेतीपंप जोडणी आणि इतर तांत्रिक अडचणींबाबत अनेक दिवसांपासून पाठपुरावा करूनही कोणतीही ठोस कार्यवाही होत नसल्याचा आरोप करत शिवसैनिक आणि शेतकरी बांधवांनी आक्रमक भूमिका घेतली. “जोपर्यंत लेखी आश्वासन मिळत नाही, तोपर्यंत आंदोलन मागे घेणार नाही,” असा ठाम इशारा यावेळी आंदोलनकर्त्यांनी दिला.
चांगदेव परिसरातील अनेक गावांमध्ये शेतकऱ्यांना गेल्या काही दिवसांपासून अनियमित वीजपुरवठा, शेतीपंपांच्या जोडणीतील विलंब आणि देखभाल दुरुस्तीची कामे रखडल्याने अडचणींचा सामना करावा लागत आहे. पावसाळा सुरू होण्याच्या उंबरठ्यावर शेतीची कामे वेगाने सुरू असताना वीजपुरवठा सुरळीत नसल्याने शेतकरी चिंतेत आहेत. वारंवार तक्रारी करूनही महावितरणचे अधिकारी आणि संबंधित ठेकेदारांकडून अपेक्षित प्रतिसाद मिळत नसल्याने शेतकऱ्यांमध्ये नाराजी वाढली होती.
या पार्श्वभूमीवर आमदार चंद्रकांतभाऊ पाटील यांच्या मार्गदर्शनाखाली शिवसेना पदाधिकाऱ्यांनी महावितरण कार्यालय गाठत शाखा अभियंता चौहान यांच्या दालनात ठिय्या आंदोलन सुरू केले. यावेळी शेतकऱ्यांच्या विविध प्रलंबित कामांची माहिती देणारे निवेदन अधिकाऱ्यांकडे सादर करण्यात आले. परिसरातील शेतकऱ्यांच्या वतीने वीजपुरवठा नियमित करणे, प्रलंबित जोडण्या पूर्ण करणे आणि दुरुस्तीची कामे तातडीने मार्गी लावावीत, अशी मागणी करण्यात आली.
आंदोलनादरम्यान शेतकरी आणि शिवसेना पदाधिकाऱ्यांनी अधिकाऱ्यांसमोर तीव्र नाराजी व्यक्त केली. अनेक दिवसांपासून समस्या मांडूनही ठोस निर्णय होत नसल्याने आता रस्त्यावर उतरावे लागत असल्याचे शेतकऱ्यांनी सांगितले. शेतीच्या हंगामात वीजपुरवठा खंडित राहिल्यास त्याचा थेट परिणाम पिकांवर होणार असल्याने प्रशासनाने याकडे गंभीरतेने लक्ष देणे आवश्यक असल्याचे आंदोलनकर्त्यांनी स्पष्ट केले.
अखेर संबंधित अधिकाऱ्यांनी प्रलंबित कामे मार्गी लावण्याबाबत लेखी आश्वासन दिल्यानंतर आंदोलन तात्पुरते मागे घेण्यात आले. मात्र पुढील तीन दिवसांत प्रत्यक्ष कामांना सुरुवात झाली नाही, तर अधिक तीव्र स्वरूपाचे आंदोलन आणि बेमुदत उपोषण छेडण्यात येईल, असा इशाराही शिवसेनेच्या पदाधिकाऱ्यांनी दिला. त्यामुळे महावितरण प्रशासनावर आता निश्चित कालमर्यादेत कामे पूर्ण करण्याचा दबाव वाढला आहे.
या आंदोलनात शिवसेना उपजिल्हा संघटक पंकज कोळी, माजी नगरसेवक नीलेश शीरसाठ, गणेश टोगे, शिवसेना अनुसूचित जाती तालुका अध्यक्ष राजेंद्र वानखेडे, युवासेना उपतालुकाप्रमुख अक्षय चौधरी, माजी सरपंच सूपडू बोदडे, रतीराम शीरसोडे यांच्यासह परिसरातील मोठ्या संख्येने शेतकरी उपस्थित होते. यावेळी उपअभियंता राऊत आणि चांगदेव विभागाचे एई भोपळे हेही उपस्थित होते.
