अमळनेर – लाईव्ह ट्रेंड्स न्यूज प्रतिनिधी । अमळनेर पंचायत समिती निवडणुकीसाठी गणवार आरक्षण सोडत आज सोमवार, १३ ऑक्टोबर रोजी काढण्यात आली. दुपारी बारा वाजता नगर परिषद सभागृहात पार पडलेल्या या सोडतीस धुळे उपजिल्हाधिकारी संजय बागडे अध्यक्षस्थानी होते. या सोडतीत एकूण दहा गणांसाठी आरक्षण निश्चित करण्यात आले. प्रक्रियेला प्राधिकृत अधिकारी व तहसिलदार रुपेशकुमार सुराणा, निवडणूक नायब तहसिलदार अजय कुलकर्णी, महसूल नायब तहसिलदार रुपाली अडकमोल, तसेच प्रदीप महाले, किशोर साळुंके, सचिन निकम, अक्षय सातपुते आदी अधिकारी उपस्थित होते. संपूर्ण प्रक्रिया पारदर्शक आणि शांततेत पार पडली.
या सोडतीची विशेषता म्हणजे ती एका दहा वर्षांच्या विद्यार्थ्याच्या हस्ते करण्यात आली. विराट शिंदे या बालकाच्या हातून सोडत काढण्यात आली. सोडतीनुसार कमळसरे गण अनुसूचित जमाती (महिला) प्रवर्गासाठी, तर प्र. डांगरी गण अनुसूचित जमाती प्रवर्गासाठी राखीव ठेवण्यात आला आहे. अमळगाव गण नागरिकांचा मागास प्रवर्गासाठी तर पातोंडा गण अनुसूचित जमाती (महिला) प्रवर्गासाठी निश्चित करण्यात आला आहे.
तसेच दहिवद, सारबेटे बु. आणि जानवे गण हे सर्वसाधारण प्रवर्गासाठी खुले ठेवण्यात आले आहेत. मुडी प्र. डा. गण सर्वसाधारण (महिला) प्रवर्गासाठी राखीव ठरला आहे. मांडळ गण नागरिकांचा मागास प्रवर्ग (महिला) तर मंगरूळ गण सर्वसाधारण (महिला) प्रवर्गासाठी निश्चित करण्यात आला आहे.
या सोडतीनंतर विविध राजकीय संघटनांनी आगामी निवडणुकांसाठी तयारी सुरू केली असून, आरक्षण संरचनेनुसार उमेदवार ठरवण्याची चाचपणी सुरू झाली आहे. स्थानिक राजकारणात या सोडतीनंतर नव्या समीकरणांना आणि राजकीय चर्चांना उधाण आले आहे.
अमळनेर पंचायत समितीच्या दहा गणांसाठी काढलेल्या आरक्षण सोडतीत अनुसूचित जमाती, मागासवर्ग आणि महिला प्रवर्गांना संतुलित प्रतिनिधित्व देण्यात आले आहे. पारदर्शकतेने पार पडलेल्या या प्रक्रियेनंतर पंचायत समिती निवडणुकीच्या तयारीला वेग येणार आहे.
