चोपडा-लाईव्ह ट्रेंडस न्यूज प्रतिनिधी । चोपडा शहरातील बस स्थानकात बसमध्ये चढत असताना गर्दीचा फायदा घेत एका महिलेच्या पर्समधून सोन्याचे दागिने आणि रोख रक्कम असा एकूण ९२ हजार रुपयांचा ऐवज चोरून नेल्याची घटना मंगळवारी (२४ जून) दुपारी दोन वाजता घडली. या प्रकरणी बुधवारी (२५ जून) चोपडा शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
संगीता समाधान पाटील (वय ३६, रा. पिंप्राळा, ता. जळगाव) या कामानिमित्त २४ जून रोजी चोपड्याला गेल्या होत्या. दुपारी त्या बस स्थानकातून बसमध्ये चढत असताना प्रचंड गर्दी होती. याच गर्दीचा गैरफायदा घेत चोरट्यांनी त्यांच्या हातात असलेल्या पर्समधून सोन्याचे दागिने आणि रोख रक्कम असा एकूण ९२ हजार रुपये किमतीचा ऐवज लंपास केला.
ही घटना लक्षात येताच संगीता पाटील यांनी तातडीने चोपडा शहर पोलिसांत धाव घेतली आणि या संदर्भात फिर्याद दिली. पोलिसांनी त्यांच्या तक्रारीवरून अज्ञात चोरट्यांविरोधात गुन्हा दाखल केला आहे. या प्रकरणाचा पुढील तपास पोलीस उपनिरीक्षक अनिल भुसारे करत आहेत. बस स्थानकात झालेल्या या चोरीमुळे प्रवाशांमध्ये भीतीचे वातावरण निर्माण झाले आहे.
