मुक्ताईनगर-लाईव्ह ट्रेंड्स न्यूज प्रतिनिधी । तापी परिसर बहुउद्देशीय ग्राम विकास संस्था संचलित सौ. कुसुमताई इंग्लिश मीडियम स्कूल, अंतुर्ली येथे आंतरराष्ट्रीय योग दिन मोठ्या उत्साहात व आनंदी वातावरणात साजरा करण्यात आला. विद्यार्थ्यांनी उत्स्फूर्त सहभाग नोंदवत योगाच्या विविध आसनांचे सादरीकरण केले.
योग दिनाच्या कार्यक्रमाला विद्यार्थ्यांचा उत्साह वाढवण्यासाठी तसेच कार्यक्रम यशस्वी करण्यासाठी संस्थेचे अध्यक्ष भागवत महाजन, उपाध्यक्ष शरदजी महाजन, सचिव पी. आर. पाटील सर, संचालक टी. के. पाटील सर, भाऊराव महाजन, मोती शेख, कुसुमताई महाजन, वैशालीताई दिनेश पाटील, श्रीराम महाजन, जगन्नाथ पाटील, विशाल पाटील, भास्कर महाजन, रामदास सोनवणे यांच्यासह संस्थेचे पदाधिकारी व संचालक मंडळ उपस्थित होते.
शाळेचे प्रशासक मासुळे सर यांनी आंतरराष्ट्रीय योग दिनाचे नियोजन केले. प्राचार्या सौ. प्रियंका पवार मॅडम यांच्या मार्गदर्शनाखाली कार्यक्रमाचे यशस्वी आयोजन करण्यात आले. यावेळी विद्यार्थ्यांनी विविध योगासने, प्राणायाम व योगाभ्यासाचे प्रात्यक्षिक सादर केले. प्राचार्या सौ. प्रियंका पवार यांनी विद्यार्थ्यांना योगाचे शारीरिक, मानसिक व बौद्धिक आरोग्यासाठी असलेले महत्त्व समजावून सांगितले. नियमित योगाभ्यासामुळे एकाग्रता वाढते, शरीर निरोगी राहते आणि सकारात्मक ऊर्जा मिळते, असे त्यांनी सांगितले.
कार्यक्रमाच्या यशस्वीतेसाठी शाळेतील सर्व शिक्षक व शिक्षकेतर कर्मचाऱ्यांनी परिश्रम घेतले. उपस्थित पालकांनी योग दिनाच्या आयोजनाबाबत समाधान व्यक्त करत शाळेत विद्यार्थ्यांसाठी नियमित योग प्रशिक्षण घेण्यात यावे, अशी अपेक्षा व्यक्त केली. सौ. कुसुमताई इंग्लिश मीडियम स्कूलमध्ये आयोजित या योग दिन कार्यक्रमामुळे विद्यार्थ्यांमध्ये आरोग्यविषयक जागरूकता निर्माण झाली असून, योगाची सवय जीवनाचा भाग बनवण्याचा संदेश देण्यात आला.
