जळगाव-लाईव्ह ट्रेंडस न्यूज प्रतिनिधी । गोदावरी अभियांत्रिकी महाविद्यालयाच्या प्रथम वर्ष संगणक अभियांत्रिकी शाखेची विद्यार्थिनी नयन लालवानी हिने भारतीय जनता युवा मोर्चा, महाराष्ट्र यांच्या वतीने आयोजित ‘मॉक पार्लमेंट’ (नमुना संसद) वादविवाद स्पर्धेत द्वितीय क्रमांक पटकावून महाविद्यालयाचे नाव रोशन केले आहे.
दापोरीकर हॉल, जळगाव येथे झालेल्या या स्पर्धेत गोदावरी अभियांत्रिकी महाविद्यालयाचे एकूण १५ विद्यार्थ्यांनी सहभाग घेतला होता. स्पर्धेतील एकूण ६० सहभागींमधून नयन लालवानीने संपूर्ण स्पर्धेत दुसरा क्रमांक पटकावला, तर विरोधी पक्षातून तिने पहिला क्रमांक पटकावला. या मॉक पार्लमेंटमध्ये नयनने काँग्रेस पक्षाचे प्रतिनिधित्व केले आणि आणीबाणीच्या स्थितीला पाठिंबा दिला.
या सत्रात १९७५ ते १९७७ हा आणीबाणीचा कालखंड पुन्हा उभा करण्यात आला होता, जिथे भाजप सत्ताधारी पक्ष आणि काँग्रेस विरोधी पक्ष म्हणून कार्यरत होते. भारतीय संविधानावर आधारित संसद सत्राच्या स्वरूपात हा कार्यक्रम आयोजित करण्यात आला होता. प्रत्येक सहभागीला आपले विचार मांडण्यासाठी ९० सेकंदांचा वेळ देण्यात आला होता. तसेच, इतर स्पर्धकांच्या मतांवर शंका घेण्याची किंवा प्रश्न विचारण्याची संधीही स्पर्धकांना बॅच उचलून देण्यात आली होती. ही संपूर्ण प्रक्रिया दोन सत्रांमध्ये पार पडली.
या कार्यक्रमाला विशेष अतिथी म्हणून विश्वास कुलकर्णी उपस्थित होते, ज्यांनी प्रत्यक्ष आणीबाणीच्या काळात कारावास भोगला होता. त्यांनी आपले अनुभव विद्यार्थ्यांशी मनमोकळेपणे शेअर केले. प्रा. नकुल गाडगे आणि प्रा. वेलचंद होले यांनी विद्यार्थ्यांना या स्पर्धेसाठी मार्गदर्शन केले. तृतीय वर्ष बी.टेक.चा विद्यार्थी चेतन बाविस्कर याने कार्यक्रमाच्या शेवटी आभार प्रदर्शन केले.
नयनच्या या यशाबद्दल गोदावरी फाउंडेशनचे अध्यक्ष डॉ. उल्हास पाटील, सचिव डॉ. वर्षा पाटील, सदस्य डॉ. केतकी पाटील, डॉ. वैभव पाटील (डीएम कार्डिओलॉजिस्ट) आणि डॉ. अनिकेत पाटील, प्राचार्य डॉ. विजयकुमार पाटील, बेसिक सायन्सेस आणि ह्युमिनिटीज विभागाचे प्रमुख डॉ. नितीन भोळे सर, तसेच प्रथम वर्षाचे सर्व प्राध्यापक आणि सर्व शाखांचे विभागप्रमुख यांनी तिचे हार्दिक अभिनंदन केले आहे.
