पाचोरा-लाईव्ह ट्रेंडस न्यूज प्रतिनिधी । पाचोरा शहरातील व्हीपी रोडवरील सुपडू भादू पाटील शाळेत कार्यरत असलेले शिक्षक रवींद्र भारत महाले (वय अंदाजे ४०-४५) यांनी गळफास घेऊन आत्महत्या केल्याची धक्कादायक घटना आज समोर आली आहे. या घटनेमुळे शाळेतील शिक्षकवर्ग आणि विद्यार्थ्यांमध्ये शोक आणि चिंतेचे वातावरण पसरले आहे. रवींद्र महाले हे त्यांच्या बोलक्या स्वभावामुळे आणि चांगल्या व्यक्तिमत्त्वामुळे परिसरात सर्वपरिचित होते, त्यामुळे या घटनेने हळहळ व्यक्त होत आहे.
घटनेची माहिती मिळताच पाचोरा पोलीस ठाण्याचे निरीक्षक अशोक पवार, सहायक पोलीस निरीक्षक श्री. निकुंभ, उपनिरीक्षक श्री. घायाळ, पोलीस हवालदार योगेश पाटील, कर्मचारी हरीश परदेशी, संतोष राजपूत आणि वाहनचालक संभाजी पाटील यांनी तात्काळ घटनास्थळी धाव घेतली. यावेळी जय मल्हार चालक बबलू मराठे, किशोर लोहार आणि अमोल पाटील यांच्या मदतीने मृत शिक्षकाला गळफासाच्या अवस्थेतून खाली उतरवण्यात आले.
रवींद्र महाले यांनी शाळेच्या तिसऱ्या मजल्यावर, ते शिकवत असलेल्या वर्गासमोरील एका वर्गात आत्महत्या केली होती. त्यांचा मृतदेह तात्काळ पाचोरा ग्रामीण रुग्णालयात शवविच्छेदनासाठी पाठवण्यात आला आहे.
या आत्महत्येचे नेमके कारण अद्याप अस्पष्ट असून, पाचोरा पोलीस याबाबत सखोल चौकशी करत आहेत. एका लोकप्रिय शिक्षकाने अचानक हे टोकाचे पाऊल उचलल्याने अनेक प्रश्न निर्माण झाले असून, पोलीस तपासातूनच सत्य समोर येईल अशी अपेक्षा आहे.
