जळगाव-लाईव्ह ट्रेंडस न्यूज प्रतिनिधी । गोदावरी अभियांत्रिकी महाविद्यालयात नॅशनल “स्टार्टअप डे” निमित्ताने स्वावलंबी भारत अभियान अंतर्गत आयोजित उद्यमिता संमेलन मोठ्या उत्साहात संपन्न झाले. या संमेलनाचे आयोजन डॉ. केतकी पाटील यांच्या पुढाकारातून झाले असून, नवोदित उद्योजकांना स्टार्टअपच्या माध्यमातून स्वावलंबन आणि उद्योजकतेचा मार्ग दाखवण्याचे उद्दिष्ट ठेवण्यात आले होते.
भारताच्या स्टार्टअप चळवळीला गती:
पंतप्रधान नरेंद्र मोदी यांनी १६ जानेवारी २०१६ रोजी सुरू केलेल्या स्टार्टअप इंडिया उपक्रमाच्या यशस्वी वाटचालीचे प्रतीक म्हणून राष्ट्रीय स्टार्टअप डे साजरा केला जातो. या उपक्रमामुळे गेल्या दशकभरात भारतातील स्टार्टअप्सच्या विकासाला प्रोत्साहन मिळाले आहे. या पार्श्वभूमीवर, गोदावरी अभियांत्रिकी महाविद्यालय आणि स्वावलंबी भारत अभियान यांच्या संयुक्त विद्यमाने दि. १६ जानेवारी २०२५ रोजी आयोजित संमेलनात अनेक मान्यवर वक्त्यांनी विद्यार्थ्यांना प्रेरणा दिली.
प्रमुख उपस्थिती आणि मार्गदर्शन :
कार्यक्रमाच्या अध्यक्षस्थानी डॉ. केतकी पाटील होत्या, तर खासदार स्मिताताई वाघ यांची प्रमुख उपस्थिती लाभली. अन्य मान्यवरांमध्ये प्रा. डॉ. विजयकुमार पाटील (प्राचार्य, गोदावरी अभियांत्रिकी महाविद्यालय), डॉ. विकास गीते, प्रशांत पाटील (जिल्हा उद्योग केंद्र), डॉ. युवराज परदेशी, आणि डॉ. प्रशांत वारके (संचालक, गोदावरी आयएमआर) यांचा समावेश होता. योगेश उदगीरे, संचालक, त्रिनेत्रीनी क्वाँटम प्रा. लि., यांनी प्रॉम्प्ट इंजिनिअरिंग, आर्टिफिशियल इंटेलिजन्स टूल्स, आणि चाट जीपीटी यांसारख्या तंत्रज्ञानाचा व्यावसायिक उपयोग कसा करता येईल, यावर विद्यार्थ्यांना मार्गदर्शन केले. त्यांनी इकोसिस्टम, ब्लॉकचेन तंत्रज्ञान, आणि डिजिटल मार्केटिंगचे महत्त्व पटवून दिले.
डॉ. विकास गीते यांनी स्टार्टअप्सचे फायदे आणि त्या संदर्भातील शासकीय योजनांची माहिती दिली. कमी भांडवलातही व्यवसाय सुरू कसा करता येईल, यावर त्यांनी उपयुक्त उदाहरणांसह विवेचन केले.
“स्टार्टअप म्हणजे सुरुवात” – डॉ. केतकी पाटील
डॉ. केतकी पाटील यांनी विद्यार्थ्यांना उद्देशून सांगितले की, “स्टार्टअप म्हणजे केवळ व्यवसाय सुरू करणे नाही, तर एक नवी सुरुवात आहे. भारत आज स्टार्टअप्सच्या युगात प्रगती करत असून जगभरात तिसऱ्या क्रमांकावर आहे. आपल्या भागात स्पर्धा कमी असल्याने विद्यार्थ्यांना प्रगतीसाठी मोठी संधी आहे.” त्यांनी विद्यार्थ्यांना विविध भाषांवरील प्रभुत्व आणि प्राचीन बुद्धिमत्तेचा वापर करून नवकल्पना करण्याचा सल्ला दिला.
खासदार स्मिताताई वाघ यांचा संदेश
खासदार स्मिताताई वाघ, या स्वतः एक यशस्वी उद्योजिका राहिलेल्या असल्याने त्यांनी विद्यार्थ्यांना प्रेरणादायक अनुभव कथन केले. “नोकर्‍या मागणारे नव्हे, तर नोकर्‍या देणारे व्हा,” असा संदेश देत त्यांनी स्टार्टअप्सच्या महत्त्वावर भर दिला. तसेच, अशा कार्यक्रमांच्या सातत्याने आयोजनावर त्यांनी भर दिला.
जळगावच्या तरुणांसाठी नवा अध्याय
उद्यमिता संमेलनातून जळगाव जिल्ह्यातील तरुणांना उद्योगक्षेत्रातील नवीन वाटा शोधण्यासाठी प्रोत्साहन मिळाले. मान्यवर वक्त्यांच्या मार्गदर्शनामुळे विद्यार्थ्यांना स्वतःचे व्यवसाय प्रारंभ करण्यासाठी महत्त्वाची माहिती आणि प्रेरणा मिळाली. कार्यक्रमाचे सूत्रसंचालन व आभार प्रदर्शन विद्यार्थिनी नीलाक्षी बर्डे व हेमांगी बावा यांनी केले. कार्यक्रमाच्या यशस्वीतेसाठी डॉ. विजयकुमार पाटील, डॉ. हेमंत इंगळे, प्रा. महेश पाटील, आणि डॉ. अतुल बर्‍हाटे यांनी विशेष परिश्रम घेतले.
