स्थानिक महिलांनी नगरपंचायत प्रशासनाला स्पष्ट इशारा दिला असून तातडीने कचरा संकलन नियमित सुरू न झाल्यास नगरपंचायत कार्यालयासमोर तीव्र आंदोलन छेडण्यात येईल, असा इशारा दिला आहे. नागरिकांकडून कर आणि विविध शुल्कांची नियमित वसुली केली जाते; मात्र त्याबदल्यात मूलभूत स्वच्छता सेवाच वेळेवर मिळत नसल्याने प्रशासनाच्या कार्यक्षमतेवर प्रश्न उपस्थित होत आहेत.
‘स्वच्छ शहर’च्या घोषणा आणि प्रत्यक्षातील स्वच्छता व्यवस्थेमध्ये मोठी दरी असल्याचे चित्र या घटनेतून समोर आले आहे. नगरपंचायत प्रशासनाने या प्रकरणाची तातडीने दखल घेऊन जबाबदार अधिकाऱ्यांवर कारवाई करावी तसेच प्रभाग क्रमांक १३ मध्ये नियमित कचरा संकलन सुरू करावे, अशी ठाम मागणी नागरिकांनी केली आहे.
या संपूर्ण प्रकारामुळे मुक्ताईनगर नगरपंचायतीच्या स्वच्छता व्यवस्थेबाबत गंभीर प्रश्न निर्माण झाले असून नागरिकांना मूलभूत सुविधा वेळेवर मिळणार का, असा सवाल उपस्थित होत आहे.
