जळगाव-लाईव्ह ट्रेंड्स न्यूज प्रतिनिधी । जळगाव जिल्ह्यात अवैध शस्त्र बाळगणाऱ्या व्यक्तींविरोधात पोलिसांनी कारवाईचा धडाका सुरू ठेवला आहे. जिल्हा पोलीस अधीक्षक सोमनाथ वाघचौरे यांनी अवैध शस्त्रांवर कठोर कारवाई करण्याचे आदेश दिले आहेत. त्यानुसार पिंपळगाव हरेश्वर पोलीस ठाण्याच्या पथकाने कारवाई करत गावठी पिस्तूल व जिवंत काडतूसासह एका आरोपीला अटक केली आहे.
पिंपळगाव हरेश्वर पोलीस ठाण्याचे पोलीस निरीक्षक कल्याणी वर्मा यांना गोपनीय बातमीदारामार्फत माहिती मिळाली होती की, पिंपळगाव हरेश्वर पोलीस ठाणे हद्दीतील सातपुडा, ता. पाचोरा परिसरात किशोर लक्ष्मण पाटील हा गावठी कट्टा घेऊन फिरत आहे. या माहितीच्या आधारे पोलिसांनी तातडीने पथक तयार करून संबंधित ठिकाणी सापळा रचला.
पोलिसांनी संशयित आरोपी किशोर लक्ष्मण पाटील याला ताब्यात घेऊन त्याची झडती घेतली असता त्याच्याकडे गावठी बनावटीचे मॅगझिनसह एक पिस्तूल आणि एक जिवंत काडतूस आढळून आले. या शस्त्राची किंमत अंदाजे २० हजार रुपये असून पोलिसांनी ते जप्त केले आहे. अटक करण्यात आलेल्या आरोपीचे नाव किशोर लक्ष्मण पाटील (वय ३२ वर्षे, रा. सावखेडा, ता. पाचोरा, जि. जळगाव) असे आहे. त्याच्याविरुद्ध पिंपळगाव हरेश्वर पोलीस ठाण्यात गुन्हा दाखल करण्यात आला असून भारतीय हत्यार कायदा कलम ३/२५ तसेच महाराष्ट्र पोलीस अधिनियम कलम ३७(१)(३) अन्वये कारवाई करण्यात आली आहे.
ही कारवाई पोलीस अधीक्षक सोमनाथ वाघचौरे, अपर पोलीस अधीक्षक अशोक नखाते आणि पाचोरा विभागाचे उपविभागीय पोलीस अधिकारी यांच्या मार्गदर्शनाखाली करण्यात आली. पोलीस निरीक्षक कल्याणी वर्मा यांच्या नेतृत्वाखाली पोहेकॉ १४८८ अतुल पवार, पोहेकॉ २३४९ अभिजीत निकम, पोना १३६६ राहुल बेहेरे, पोका २४४४ अमोल पाटील, पोका २४७० प्रमोद वाडीले, पोका ६० नामदेव इंगळे आदी कर्मचाऱ्यांनी या कारवाईत सहभाग घेतला.
पिंपळगाव हरेश्वर पोलिसांच्या या कारवाईमुळे परिसरात अवैध शस्त्र बाळगणाऱ्यांमध्ये खळबळ उडाली आहे. अवैध शस्त्रांविरोधात यापुढेही कठोर कारवाई सुरू राहणार असल्याचे पोलिसांकडून सांगण्यात आले आहे.
