जळगाव-लाईव्ह ट्रेंडस न्यूज प्रतिनिधी । जळगाव येथे आज शालेय क्रीडा स्पर्धा २०२५-२६ च्या नियोजन आणि आयोजनासंदर्भात महत्त्वपूर्ण सहविचार सभेचे आयोजन करण्यात आले होते. क्रीडा व युवक सेवा संचालनालय, महाराष्ट्र राज्य अंतर्गत जिल्हा क्रीडा परिषद, जळगाव आणि जिल्हा क्रीडा अधिकारी कार्यालय यांच्या वतीने सकाळी ११ वाजता छत्रपती शिवाजी महाराज जिल्हा क्रीडा संकुल येथे ही बैठक खेळीमेळीत पार पडली.
क्रीडा क्षेत्रातील मान्यवरांची उपस्थिती आणि नियोजनाची माहिती
या बैठकीत जिल्ह्यातील सर्व मान्यताप्राप्त एकविध खेळ संघटनांचे पदाधिकारी, शारीरिक शिक्षण महासंघ, क्रीडा शिक्षक संघटना आणि विविध क्रीडा मंडळांचे प्रतिनिधी सहभागी झाले होते. जिल्हा क्रीडा अधिकारी श्री. रवींद्र नाईक यांनी प्रास्ताविक करत आगामी स्पर्धांचे सविस्तर नियोजन, क्रीडा गुण सवलत, क्रीडा प्रमाणपत्रे, क्रीडा व युवा पुरस्कार आणि व्यायामशाळा व क्रीडांगण विकास योजनेबाबत विस्तृत माहिती दिली.
छत्रपती शिवाजी महाराज क्रीडा संकुल येथे सिंथेटिक ट्रॅकचे काम सुरू असल्याने, या शैक्षणिक वर्षात मैदानी व सांघिक स्पर्धांसाठी एकलव्य क्रीडा संकुल पर्यायी ठिकाण म्हणून निवडण्यात आले आहे. स्पर्धांची सुरुवात सुब्रतो मुखर्जी फुटबॉल स्पर्धेने होणार असून, १५ व १७ वर्षे वयोगटातील मुले-मुलींचे संघ तयार करण्याचे आवाहन जिल्हा क्रीडा अधिकारी यांनी केले.
नवीन संकल्पना आणि योजना
सहविचार सभेत ‘Train the Trainers’ (प्रशिक्षकांना प्रशिक्षण) ही नवीन संकल्पना मांडण्यात आली. याअंतर्गत जिल्ह्यात विविध ठिकाणी खेळ प्रशिक्षण केंद्रे सुरू करण्यासाठी संघटनांनी सहकार्य करण्याचे मान्य केले. तसेच पंच प्रशिक्षण कार्यशाळा आणि क्रीडा कौशल्यविकासासाठी मार्गदर्शक कार्यशाळा घेण्याचे निर्देशही यावेळी देण्यात आले. याशिवाय, सातपुडा पर्वतरांगेतील चोपडा, यावल, रावेर या तालुक्यांमध्ये १०० किमी सायकल स्पर्धा/मॅरेथॉन आयोजित करण्याची एक नावीन्यपूर्ण योजनाही सादर करण्यात आली, ज्यामुळे साहसी क्रीडा प्रकारांना प्रोत्साहन मिळेल.
समस्यांवर विचारमंथन आणि सत्कार सोहळा
यावेळी प्रदीप तळवेलकर, राजेश जाधव, अजय देशमुख, प्रशांत कोल्हे, प्रा. डॉ. श्रीकृष्ण बेलोरकर, फारुक शेख, प्रदीप साखरे आणि खुशाल देशमुख यांनी गतवर्षीच्या अडचणी व यशस्वी उपक्रमांबद्दल आपले विचार मांडले. जिल्हा क्रीडा अधिकारी यांनी उपस्थित समस्यांवरील उपायांची माहिती दिली. अंतिम सत्रात, आंतरराष्ट्रीय सॉफ्टबॉल प्रशिक्षक व राज्य क्रीडा मार्गदर्शक श्री. किशोर चौधरी यांचा थायलंड येथे आशियाई स्पर्धेत भारतीय संघाने कांस्य पदक मिळवल्याबद्दल सत्कार करण्यात आला. तसेच, राष्ट्रीय पॉवरलिफ्टिंग स्पर्धेत रौप्य पदक मिळविणाऱ्या क्रीडा विभागाच्या कु. काजल भाकरे यांचाही विशेष सत्कार करून त्यांच्या यशाचे कौतुक करण्यात आले.
