बागेश्वर बाबांवर गुन्हा दाखल करा, महाराष्ट्रात कायमस्वरूपी बंदी घाला; काँग्रेस कार्यकर्त्यांची आक्रमक मागणी

निवेदनात म्हटले आहे की, एका कार्यक्रमात धीरेंद्र शास्त्री यांनी छत्रपती शिवाजी महाराजांच्या इतिहासाची तोडमोड करून चुकीचे वक्तव्य केले असून, त्यामुळे महाराजांचा अपमान झाला आहे. या वक्तव्यामुळे राज्यातील शिवप्रेमी आणि जनतेच्या भावना दुखावल्या गेल्या आहेत. विशेष म्हणजे या कार्यक्रमात उपस्थित असलेल्या काही प्रमुख नेत्यांनी या वक्तव्याला विरोध न दर्शवल्याबद्दलही नाराजी व्यक्त करण्यात आली आहे.

काँग्रेस कार्यकर्त्यांनी या प्रकरणाला केवळ एका वक्तव्यापुरते मर्यादित न ठेवता, इतिहास आणि महापुरुषांच्या सन्मानाशी जोडलेला गंभीर विषय असल्याचे म्हटले आहे. छत्रपती शिवाजी महाराजांच्या कर्तृत्वाचा अवमान सहन केला जाणार नाही, अशी ठाम भूमिका त्यांनी घेतली. इतिहासाचे विकृतीकरण करून समाजात चुकीचे संदेश दिले जात असल्याचा आरोपही निवेदनातून करण्यात आला.

निवेदनात केंद्र व राज्य सरकारच्या धोरणांवरही टीका करण्यात आली आहे. तरुण पिढीला विज्ञानवादी दृष्टिकोनापासून दूर ठेवून अंधश्रद्धा, धर्मांधता आणि भावनिक मुद्द्यांमध्ये गुंतवण्याचा प्रयत्न होत असल्याचा आरोप करण्यात आला. देशातील तरुणांची बुद्धिमत्ता, क्षमता आणि शक्ती विकासासाठी वापरण्याऐवजी त्यांना चुकीच्या मार्गावर नेले जात असल्याची खंतही व्यक्त करण्यात आली.

तसेच मनुवादी विचारसरणी आणि निवडणूक केंद्रित राजकारणावर टीका करत, शासकीय यंत्रणांचा गैरवापर होत असल्याचा गंभीर आरोप करण्यात आला. समाजात प्रगतिशील विचार मांडणाऱ्यांवर हल्ले झाले असून, डॉ. नरेंद्र दाभोळकर, गोविंद पानसरे आणि कलबुर्गी यांच्या हत्या हे त्याचे उदाहरण असल्याचे निवेदनात नमूद करण्यात आले.

धीरेंद्र शास्त्री यांच्यावर तातडीने गुन्हा दाखल करून महाराष्ट्रात प्रवेशबंदी लागू करण्यात यावी, अशी मागणी करत शासनाने जनभावनांचा आदर करावा, असे काँग्रेस कार्यकर्त्यांनी स्पष्ट केले. अन्यथा या प्रश्नावर तीव्र आंदोलन उभारण्याचा इशाराही देण्यात आला आहे.

या संपूर्ण प्रकरणामुळे राज्याच्या राजकारणात नव्या वादाला तोंड फुटण्याची चिन्हे दिसत असून, बागेश्वर बाबांच्या वक्तव्यावरून राजकीय वातावरण तापण्याची शक्यता व्यक्त होत आहे. महापुरुषांच्या सन्मानाचा मुद्दा पुन्हा एकदा ऐरणीवर आला असून, या मागणीवर शासन काय भूमिका घेते याकडे लक्ष लागले आहे.