सावदा-लाईव्ह ट्रेंड्स न्यूज प्रतिनिधी । सावदा शहराच्या विकासासाठी महत्त्वपूर्ण पाऊल उचलत मुक्ताईनगरचे आमदार चंद्रकांत पाटील यांच्या माध्यमातून तब्बल २ कोटी रुपयांचा निधी मंजूर झाला असून शहराच्या पायाभूत सुविधा, हरित विकास, शिक्षण आणि आरोग्य क्षेत्राला यामुळे मोठी चालना मिळणार आहे. या निधीमुळे सावदा शहराच्या विकासाचा नवा अध्याय सुरू होत असल्याची भावना नागरिकांमधून व्यक्त होत आहे.
मंजूर निधीमध्ये ‘नमो उद्यान’ योजनेसाठी १ कोटी रुपये तर ‘हिंदू हृदय सम्राट बाबासाहेब ठाकरे नागरी लोककल्याण अभियान’ अंतर्गत आणखी १ कोटी रुपयांचा समावेश आहे. या निधीतून शहरातील विकासकामांना गती मिळणार असून विविध मूलभूत सुविधांच्या उभारणीसाठी हा निधी महत्त्वपूर्ण ठरणार आहे.
‘नमो उद्यान’ अंतर्गत शहरात हरित क्षेत्राचा विस्तार, सुशोभीकरण, नागरिकांसाठी विरंगुळा केंद्रांची निर्मिती आणि पर्यावरणपूरक सुविधा उभारण्यावर भर दिला जाणार आहे. शहरातील उद्यानांचे आधुनिकीकरण आणि नागरी सौंदर्यवृद्धीमुळे नागरिकांना दर्जेदार सार्वजनिक सुविधा मिळणार असल्याचे सांगण्यात येत आहे.
याचबरोबर ‘हिंदू हृदय सम्राट बाबासाहेब ठाकरे नागरी लोककल्याण अभियान’ अंतर्गत मराठी शाळांच्या दर्जोन्नतीसाठी विविध कामे हाती घेतली जाणार आहेत. शैक्षणिक सुविधा सुधारणा, आवश्यक पायाभूत विकास तसेच विद्यार्थ्यांसाठी अधिक सक्षम वातावरण निर्माण करण्यावर या निधीतून भर दिला जाणार आहे.
आरोग्य क्षेत्रातील सुविधा मजबूत करण्यासाठीही निधीचा उपयोग होणार असल्याने शहरातील नागरिकांना अधिक चांगल्या नागरी सेवा उपलब्ध होतील, अशी अपेक्षा व्यक्त होत आहे. वाढत्या शहरी गरजांचा विचार करता हा निधी सावदासाठी विकासाचा टर्निंग पॉईंट ठरणार असल्याचे बोलले जात आहे.
आमदार चंद्रकांत पाटील यांच्या माध्यमातून यापूर्वीही सावदा शहरात विविध विकासकामे मार्गी लागली असून नव्या निधीमुळे विकासाच्या प्रक्रियेला आणखी वेग मिळणार आहे. शहरातील रस्ते, सार्वजनिक सुविधा, हरित विकास आणि सामाजिक पायाभूत सुविधा अधिक मजबूत करण्यासाठी या निधीचा उपयोग होणार असल्याने स्थानिकांमध्ये समाधानाचे वातावरण आहे.
या निर्णयाचे शहरवासीयांनी स्वागत करत आमदारांच्या पाठपुराव्याचे कौतुक केले आहे. सातत्यपूर्ण विकासाच्या दृष्टीने निधी उपलब्ध करून दिल्यामुळे सावदा शहराच्या भविष्यासाठी सकारात्मक चित्र निर्माण होत असल्याची प्रतिक्रिया नागरिकांकडून व्यक्त होत आहे.
विकासाच्या दृष्टीने हा निधी केवळ आर्थिक तरतूद नसून शहराच्या सर्वांगीण उभारणीचा पाया असल्याचे मानले जात आहे. आगामी काळात या कामांची अंमलबजावणी वेळेत आणि दर्जेदार व्हावी, अशी अपेक्षाही नागरिकांनी व्यक्त केली आहे.
