मुंबई-लाईव्ह ट्रेंडस न्यूज वृत्तसेवा । महाराष्ट्रात दिवसेंदिवस वाढत असलेल्या ड्रग्स तस्करीला आळा घालण्यासाठी राज्य सरकारने आता अत्यंत कठोर पाऊल उचलले आहे. विधानपरिषदेत आज झालेल्या चर्चेदरम्यान, मुख्यमंत्री देवेंद्र फडणवीस यांनी एक महत्त्वपूर्ण घोषणा केली. त्यानुसार, आता ड्रग्स तस्करी करणाऱ्यांवर ‘महाराष्ट्र संघटित गुन्हेगारी नियंत्रण अधिनियम’ (मकोका) अंतर्गत गुन्हे दाखल केले जाणार आहेत. या निर्णयामुळे ड्रग माफियांमध्ये मोठी भीती निर्माण होण्याची शक्यता आहे.
मुख्यमंत्री फडणवीस यांनी विधानपरिषदेत स्पष्ट केले की, राज्य सरकार अंमली पदार्थांच्या तस्करीच्या मुळावर घाव घालण्यासाठी कटिबद्ध आहे. अंमली पदार्थांच्या या साखळीला पूर्णपणे तोडण्यासाठी मकोका अंतर्गत कठोर कारवाई केली जाईल. त्यांनी माहिती दिली की, राज्यभरातील प्रमुख जिल्ह्यांमध्ये अंमली पदार्थविरोधी स्वतंत्र युनिट्स कार्यरत आहेत आणि त्यांच्यामार्फत मोठ्या प्रमाणात कारवाया सुरू आहेत. तसेच, या प्रकरणांमध्ये जलद निकाल लागावा यासाठी केंद्र सरकारकडे फास्ट ट्रॅक कोर्टाची मागणी देखील करण्यात आली आहे.
भाजप आमदार परिणय फुके यांनी सभागृहात एमडी ड्रग्स आणि मेफेड्रोनच्या तस्करीबाबत प्रश्न उपस्थित केला होता. त्यांनी म्हटले की, ड्रग्स तस्करीच्या घटनांमध्ये मोठ्या प्रमाणावर वाढ झाली असून, यामुळे समाजाच्या आरोग्याला गंभीर धोका निर्माण झाला आहे. तस्करांना सहजपणे जामीन मिळत असल्याने, या प्रकरणांवर कठोर कारवाईसोबतच जलद न्यायप्रणालीची आवश्यकता असल्याचे फुके यांनी अधोरेखित केले.
या प्रश्नाला उत्तर देताना मुख्यमंत्री फडणवीस यांनी सांगितले की, सध्याच्या कायद्यामध्ये आवश्यक ते बदल करत मकोका लागू करण्याची प्रक्रिया सुरू करण्यात येणार आहे. राज्यातील ड्रग्स तस्करीचे जाळे उध्वस्त करण्यासाठी कायद्यात सुधारणा करून तीव्र कारवाई केली जाणार आहे.
याच विषयावर राष्ट्रवादी काँग्रेस (शरद पवार गट) चे आमदार एकनाथ खडसे यांनीही सभागृहात चिंता व्यक्त केली. त्यांनी मध्यप्रदेश आणि गुजरात येथून जळगाव जिल्ह्यातील मुक्ताईनगर भागात अफू आणि गांजाची तस्करी होत असल्याकडे सभागृहाचे लक्ष वेधले. यावर मुख्यमंत्री फडणवीस यांनी उत्तर दिले की, महाराष्ट्रात अफू किंवा गांजाच्या पिकासाठी कोणतीही अधिकृत परवानगी नाही. सीमाभागांमध्ये अशा घटना घडत असतील तर तात्काळ कारवाई केली जाईल, असे आश्वासन त्यांनी दिले.
मुख्यमंत्री फडणवीस यांच्या या घोषणेनंतर हे स्पष्ट झाले आहे की, राज्य सरकार ड्रग्स माफियांविरुद्ध ‘झिरो टॉलरन्स’ धोरण स्वीकारणार आहे. राज्यात ड्रग्ससंबंधी कोणतीही ढिलाई न ठेवता कायद्याच्या कक्षेत राहून कठोर कारवाई केली जाणार आहे. यामुळे ड्रग्स तस्करांचे धाबे दणाणले असून, राज्यात नव्या कायदेशीर लढ्याची सुरुवात झाली आहे.
