जळगाव – लाईव्ह ट्रेंड्स न्यूज प्रतिनिधी । जळगावच्या जैन स्पोर्ट्स अकॅडमीचे आंतरराष्ट्रीय बुद्धिबळ पंच प्रवीण ठाकरे यांची जागतिक पातळीवरील सर्वात प्रतिष्ठेच्या विश्वचषक बुद्धिबळ स्पर्धेत सहाय्यक पंच म्हणून नियुक्ती झाली आहे. दोन दशकांनंतर भारतात होणाऱ्या या स्पर्धेसाठी झालेली त्यांची निवड ही उत्तर महाराष्ट्रासाठी अभिमानाची बाब ठरली आहे.
जागतिक बुद्धिबळ संघटना (FIDE) आणि अखिल भारतीय बुद्धिबळ महासंघ (AICF) यांच्या संयुक्त विद्यमाने तसेच गोवा शासनाच्या सहकार्याने ही स्पर्धा ३१ ऑक्टोबर ते २७ नोव्हेंबर २०२५ दरम्यान आयोजित केली आहे. या विश्वचषकात ८० हून अधिक देशांतील २०६ बुद्धिबळपटू सहभागी होत असून, तीव्र रोमहर्षक आणि उत्कंठावर्धक सामने होणार आहेत.
प्रवीण ठाकरे हे याआधी अनेक राज्य, राष्ट्रीय, आशियाई तसेच वर्ल्ड ज्युनियर बुद्धिबळ स्पर्धांमध्ये पंच म्हणून काम पाहिलेले अनुभवी अधिकारी आहेत. तथापि, विश्वचषक स्तरावर पंच म्हणून निवड होणारे ते उत्तर महाराष्ट्रातील पहिलेच बुद्धिबळ पंच आहेत. त्यांच्या या यशाबद्दल जैन इरिगेशन सिस्टीम्स लिमिटेडचे अध्यक्ष अशोक जैन, सहव्यवस्थापकीय संचालक अतुल जैन, तसेच महाराष्ट्र बुद्धिबळ संघटनेचे अध्यक्ष डॉ. परिणय फुके आणि कार्याध्यक्ष सिद्धार्थ मयूर यांनी अभिनंदन करून त्यांना पुढील वाटचालीसाठी शुभेच्छा दिल्या.
या बुद्धिबळ विश्वचषक स्पर्धेत भारताचे दिग्गज खेळाडू डी. गुकेश, प्रग्नानंदा, अर्जुन इरिगेसी, विदित गुजराथी, अरविंद चिदंबरम आणि दिव्या देशमुख देशाचे प्रतिनिधित्व करणार आहेत. तर जगभरातून अनिश गिरी, वेस्ली सो, नोदरबेक अब्दुसत्तारोव, इयान नेपोमियाशी, व्हिन्सेंट केमर आणि लियोन आरोनियन यांसारखे आंतरराष्ट्रीय दर्जाचे ग्रँडमास्टर्सही या स्पर्धेत भाग घेणार आहेत.
स्पर्धेतील सर्व पंच, खेळाडू, प्रशिक्षक आणि अधिकाऱ्यांची व्यवस्था अखिल भारतीय बुद्धिबळ महासंघाच्या स्पर्धा व्यवस्थापन समिती व गोवा शासनाने केली आहे. जळगाव जिल्ह्यातील प्रतिनिधी म्हणून प्रविण ठाकरे यांची निवड महाराष्ट्रातील बुद्धिबळ प्रेमींसाठी अभिमानास्पद आणि प्रेरणादायी ठरत आहे.
या त्यांच्या यशाबद्दल जळगाव जिल्हा बुद्धिबळ संघटनेचे अध्यक्ष अतुल जैन, सचिव नंदलाल गादिया, उपाध्यक्ष फारुक शेख, तसेच जैन स्पोर्ट्स अकॅडमीचे अरविंद देशपांडे, रवींद्र धर्माधिकारी आदींनी अभिनंदन करून उज्ज्वल यशासाठी शुभेच्छा व्यक्त केल्या.
