मुक्ताईनगर-लाईव्ह ट्रेंड्स न्यूज प्रतिनिधी । मुक्ताईनगर शहरातील आनंद ट्रेडर्ससमोरील परिसरात राहणारा संदीप अशोक शिंदे हा तरुण २० ऑगस्ट २०२६ रोजी घरातील कोणालाही काहीही न सांगता अचानक घरातून निघून गेला. त्यानंतर तो अद्याप घरी परतलेला नसून, त्याचा कोणताही ठावठिकाणा लागलेला नाही. त्यामुळे कुटुंबीयांमध्ये चिंतेचे वातावरण निर्माण झाले आहे.
संदीप घरातून निघून गेल्यानंतर कुटुंबीयांनी आप्तस्वकीय, मित्रपरिवार तसेच शहर आणि परिसरातील विविध ठिकाणी त्याचा शोध घेतला. संभाव्य ठिकाणी चौकशी करूनही त्याच्याबाबत कोणतीही माहिती मिळाली नाही. अनेक दिवस उलटूनही त्याचा शोध न लागल्याने कुटुंबीयांची चिंता अधिकच वाढली आहे. या प्रकरणी संदीप शिंदे यांचे चुलतभाऊ महेंद्र रामभाऊ शिंदे यांनी मुक्ताईनगर पोलीस ठाण्यात संदीप बेपत्ता झाल्याची अधिकृत तक्रार दाखल केली आहे. पोलिसांकडे मिसिंग रिपोर्ट दाखल झाल्यानंतर त्याच्या शोधासाठी आवश्यक कार्यवाही सुरू करण्यात आली आहे.
संदीप शिंदे यांच्याबाबत कोणाला काही माहिती मिळाल्यास किंवा ते कुठे दिसून आल्यास तातडीने कुटुंबीयांशी संपर्क साधावा, असे आवाहन करण्यात आले आहे. नागरिकांकडून मिळणारी छोटीशी माहितीही शोधकार्यात महत्त्वाची ठरू शकते, त्यामुळे कोणालाही संदीप यांच्याबाबत माहिती मिळाल्यास ती दडवून न ठेवता त्वरित कुटुंबीयांना कळवावी, अशी विनंती करण्यात आली आहे. संदीप शिंदे यांच्याबाबत माहिती देण्यासाठी त्यांचे चुलतभाऊ महेंद्र रामभाऊ शिंदे यांच्याशी ९९२३० २९५०६ या मोबाईल क्रमांकावर संपर्क साधता येईल. कुटुंबीयांनी नागरिकांना शोधकार्यात सहकार्य करण्याचे आवाहन केले आहे.
