पाचोरा-लाईव्ह ट्रेंड्स न्यूज प्रतिनिधी । पाचोरा शहरातील भास्कर नगर परिसरात बंद घराचे कुलूप तोडून अज्ञात चोरट्यांनी तब्बल १ लाख ४१ हजार ५०० रुपयांचा मुद्देमाल लंपास केल्याची घटना समोर आली आहे. चोरीच्या या घटनेमुळे परिसरातील नागरिकांमध्ये खळबळ उडाली असून, घरफोडी करणाऱ्या चोरट्यांचा शोध घेण्याचे आव्हान पाचोरा पोलिसांसमोर आहे.
शुभम राजेंद्र जाधव, रा. गोराडखेडा, ता. पाचोरा हे बजाज फायनान्स कंपनीत कलेक्शन मॅनेजर म्हणून कार्यरत आहेत. त्यांच्या बहिणीचे पाचोरा शहरातील भास्कर नगर येथे घर असून, त्यांची बहीण मुंबई येथे वास्तव्यास असल्याने शुभम जाधव हे त्या घरात राहत होते. त्यांच्या कामानिमित्त वसूल केलेली रक्कमही काही काळ त्या घरात ठेवण्यात आली होती. शुभम जाधव यांनी १४ ऑगस्टच्या सायंकाळपर्यंत फायनान्स कंपनीसाठी वसूल केलेली ९० हजार रुपयांची रोकड घरात ठेवली होती. १५ ऑगस्ट रोजी स्वातंत्र्य दिनाची सुटी आणि १६ ऑगस्ट रोजी रविवार असल्याने ही रक्कम सोमवारी बँकेत जमा करण्याचे नियोजन होते. त्यानुसार १५ ऑगस्ट रोजी सायंकाळी सुमारे ६ वाजता त्यांनी भास्कर नगरातील घराला कुलूप लावले आणि ते गोराडखेडा येथे गेले. दरम्यान, अज्ञात चोरट्यांनी बंद घरावर पाळत ठेवून संधी साधली. घराचे कुलूप तोडून चोरट्यांनी आत प्रवेश केला. घरातील कपाट उघडून त्यामधील बजाज फायनान्स कंपनीची ९० हजार रुपयांची रोकड, सुमारे ५० हजार रुपये किमतीची ५ ग्रॅम वजनाची सोन्याची अंगठी आणि १ हजार ५०० रुपये किमतीची चांदीची पैंजण असा एकूण १ लाख ४१ हजार ५०० रुपयांचा मुद्देमाल चोरून नेला.
१६ ऑगस्ट रोजी सकाळी सुमारे १० वाजता शुभम जाधव भास्कर नगरातील घरी परतले असता त्यांना घराचे कुलूप तुटलेले दिसले. घरात प्रवेश केल्यानंतर कपाट उघडे असल्याचे त्यांच्या निदर्शनास आले. तपासणी केली असता रोकड, सोन्याची अंगठी आणि चांदीची पैंजण चोरीस गेल्याचे स्पष्ट झाले. त्यांनी तत्काळ पाचोरा पोलिसांना घटनेची माहिती दिली. माहिती मिळताच पोलिसांनी घटनास्थळी धाव घेत पंचनामा केला. शुभम जाधव यांच्या फिर्यादीवरून पाचोरा पोलिस ठाण्यात अज्ञात चोरट्यांविरुद्ध चोरीचा गुन्हा दाखल करण्यात आला आहे. पोलिसांकडून परिसरातील संभाव्य सीसीटीव्ही फुटेज तसेच इतर बाबींच्या आधारे चोरट्यांचा शोध घेण्याचे काम सुरू आहे.
दरम्यान, पाचोरा शहरातील विविध कॉलनी परिसरात बंद घरांना लक्ष्य करून घरफोडीच्या घटना घडत असल्याने नागरिकांमध्ये चिंतेचे वातावरण आहे. बंद घरांची पाहणी करून संधी साधणाऱ्या चोरट्यांना आळा घालण्यासाठी पोलिस प्रशासनाने रात्रीची गस्त वाढवावी, तसेच संवेदनशील भागात नियमित पेट्रोलिंग करावे, अशी मागणी नागरिकांकडून होत आहे. भास्कर नगरातील या घरफोडीत कंपनीची रोकड आणि दागिने असा १ लाख ४१ हजार ५०० रुपयांचा मुद्देमाल चोरीला गेला असून, पाचोरा पोलिस अज्ञात चोरट्यांचा कसून शोध घेत आहेत. शहरातील वाढत्या घरफोड्यांच्या पार्श्वभूमीवर रात्रीची पोलिस गस्त वाढविण्याची मागणीही जोर धरत आहे.
