अमळनेर लाईव्ह ट्रेंडस न्यूज प्रतिनिधी । पहूर आणि अमळनेर तालुक्यातून गुरे चोरीच्या गुन्ह्यात ताब्यात घेतलेल्या चार जणांपैकी इतर दोन संशयित आरोपींनी पोलीस वाहनातून बेड्यांसह पळ काढल्याची धक्कादायक घटना बुधवारी २२ ऑक्टोबर रोजी रात्री ११.३० वाजता घडली होती. याप्रकरणी गुरूवारी २३ ऑक्टोबर रोजी दुपारी ३ वाजता अमळनेर पोलीस ठाण्यात गुन्हा दाखल करण्यात आला आहे.
अमळनेर तालुक्यातील लोणे आणि पिंपळे येथून सात, तर पहूर तालुक्यातून तीन गुरे चोरीच्या घटना घडल्या होत्या. स्थानिक गुन्हा अन्वेषण विभागाचे पोलीस संदीप पाटील, प्रवीण मांडोळे, हरीलाल पाटील आणि राहुल कोळी या गुन्ह्यांचा तपास करत होते. तपासादरम्यान, सीसीटीव्ही फुटेजमधून (एमएच १९ बीबी ५१९८) क्रमांकाची दुचाकी आढळून आली. तांत्रिक माहितीच्या आधारे पोलिसांनी दुचाकीचा मालक अकील कादिर पिंजारी (रा. आझाद नगर, पिंप्राळा, जळगाव) याला ताब्यात घेतले.
पोलिसी खाक्या दाखवताच अकील पिंजारी याने आपल्या साथीदारांसह गुरे चोरी केल्याचे कबूल केले. यात शाकीर शाह अरमान शाह (वय ३०, रा. सुप्रीम कॉलनी, जळगाव), अमजद शेख फकीर कुरेशी (वय ३५, रा. मेहरुण), आफताब आलम शेख रहीम (रा. नशिराबाद), आणि तौसिफ शेख नबी (रा. फातिमा नगर) या चार जणांचाही समावेश होता. त्यांनी चोरीसाठी पिकअप वाहन क्रमांक (एमएच १९ सीव्ही ७१६९) वापरल्याचे सांगितले.
पोलिसांनी चार आरोपींना ताब्यात घेतले. यातील तौसिफ नबी हा घरी मिळून आला नाही. स्पॉट व्हेरिफिकेशनसाठी चौघांना शासकीय वाहनाने अमळनेरला आणले जात होते. दरम्यान, शाकीर शाह अरमान शाह आणि अमजद शेख फकीर कुरेशी हे दोघे बेड्या घातलेल्या अवस्थेत असतानाच चांणी कुऱ्हे अंडरपासजवळ वाहनातून उतरून पळून गेले. आरोपी अंधाराचा फायदा घेऊन पिकात लपून गेले. इतर दोन आरोपींना घेऊन पोलीस अमळनेर पोलीस ठाण्यात दाखल झाले. फरार झालेल्या दोन्ही आरोपींविरुद्ध भारतीय न्याय संहिता कलम २६२ (सरकारी तावडीतून पळून जाणे) प्रमाणे गुन्हा दाखल करण्यात आला आहे. पोलीस उपनिरीक्षक नामदेव बोरकर या घटनेचा तपास करत आहेत. .
