मुंबई – लाईव्ह ट्रेंड्स न्यूज वृत्तसेवा। बॉलीवूडच्या झगमगाटामागे अनेक अशा गोष्टी दडलेल्या असतात ज्या समोर आल्या की कलाविश्वाच्या चमकत्या पडद्यामागील वास्तव उघडे पडते. ज्येष्ठ अभिनेत्री रेखा यांच्याशी संबंधित अशीच एक धक्कादायक घटना आजही लोकांच्या स्मरणात आहे. वयाच्या केवळ १५व्या वर्षीच रेखाला चित्रीकरणादरम्यान तिच्या संमतीविना किस केल्याची घटना समोर आली होती. या घटनेने तिच्या आयुष्यात आणि बॉलीवूडमध्येही मोठा वाद निर्माण झाला होता.
१९७०च्या दशकात सुरू असलेल्या ‘अंजना सफर’ या चित्रपटाच्या चित्रीकरणादरम्यान ही घटना घडली. त्यावेळी रेखा अवघ्या १५ वर्षांची होती, तर तिच्यासोबत झळकणारा बंगाली अभिनेता विश्वजीत चॅटर्जी हे ३२ वर्षांचे होते. चित्रपटातील एका दृश्यात अचानक किसिंग सीनचा समावेश करण्यात आला. विशेष म्हणजे रेखाला या दृश्याची कोणतीही पूर्वकल्पना देण्यात आली नव्हती. दिग्दर्शक आणि अभिनेता दोघांनीही हे मुद्दाम लपवून ठेवल्याचं रेखा नंतरच्या काळात म्हणाल्या.
यासर उस्मान लिखित “रेखा: द अनटोल्ड स्टोरी” या पुस्तकात या घटनेचं सविस्तर वर्णन करण्यात आलं आहे. त्यानुसार, चित्रीकरण सुरू असताना विश्वजीत यांनी अचानक रेखाला धरून तिचे चुंबन घ्यायला सुरुवात केली. हे दृश्य सुमारे पाच मिनिटांपर्यंत सुरू होतं आणि सेटवरील कुणीही — अगदी दिग्दर्शकानेही — यामध्ये हस्तक्षेप केला नाही. तेव्हा या तरुण वयात असलेल्या रेखा पूर्णपणे हादरल्या. दृश्य पूर्ण झाल्यावर त्या फूटफूटून रडल्या आणि या प्रकाराचा त्यांच्यावर खोल परिणाम झाला.
या घटनेनंतर माध्यमांमध्ये प्रचंड गहजब झाला. लोकांनी रेखाच्या बाजूने आवाज उठवला, तर विश्वजीत चॅटर्जीने या प्रकरणावर प्रतिक्रिया देताना म्हटले की, “मी केवळ दिग्दर्शकाने सांगितलेले काम केले.” त्यांनी आपल्याकडून काहीही चुकीचं झाल्याचं मान्य केलं नाही. मात्र, अनेक वर्षांनंतरही ही घटना रेखाच्या सुरुवातीच्या कारकिर्दीतील काळ्या आठवणीपैकी एक मानली जाते.
रेखा नंतर स्वतःला सावरून एक यशस्वी आणि प्रभावी अभिनेत्री म्हणून सिद्ध झाल्या. पण या प्रकारामुळे बालवयातील एका अभिनेत्रीच्या भावनिक आणि मानसिक आरोग्यावर झालेला परिणाम किती खोलवर असू शकतो, हे या घटनेतून स्पष्ट होतं. बॉलीवूडमधील अशा अनेक अनुत्तरित घटनांमध्ये ही एक ठळक उदाहरण म्हणून आजही चर्चिली जाते.
