जळगाव-लाईव्ह ट्रेंड्स न्यूज प्रतिनिधी । नटश्रेष्ठ बालगंधर्व यांच्या स्मृतिप्रीत्यर्थ आयोजित करण्यात आलेल्या बाल नाट्यगीत गायन स्पर्धेत अनुभूती इंग्लिश मिडीयम स्कूलच्या आराध्य भूषण खैरनार याने आपल्या सुरेल सादरीकरणाने सर्वोत्कृष्ट पुरस्कार पटकावत विजेतेपदावर नाव कोरले. जिल्ह्यातील विविध भागांतील स्पर्धकांच्या सहभागामुळे स्पर्धेला रंगत आली असून बालकलाकारांच्या कलागुणांना व्यासपीठ उपलब्ध करून देण्याचा उद्देश यशस्वी ठरला.
अखिल भारतीय मराठी नाट्य परिषद, जळगाव जिल्हा शाखा आणि बालरंगभूमी परिषद, जळगाव जिल्हा शाखा यांच्या संयुक्त विद्यमाने केसीईच्या आयएमआर कॉलेजच्या ऑडिटोरियममध्ये लहान मुलांसाठी नाट्यगीत गायन स्पर्धेचे आयोजन करण्यात आले होते. नटश्रेष्ठ बालगंधर्व यांच्या स्मृतिप्रीत्यर्थ आयोजित या स्पर्धेत जळगाव, भुसावळ, अमळनेर आणि चाळीसगाव येथील बालस्पर्धकांनी उत्स्फूर्त सहभाग नोंदवत आपल्या गायनकलेचे उत्कृष्ट सादरीकरण केले.
स्पर्धेतील सर्वोत्कृष्ट पुरस्कार अनुभूती इंग्लिश मिडीयम स्कूलच्या आराध्य भूषण खैरनार याने पटकावला. उत्कृष्ट पुरस्कार स्कायविन इंटरनॅशनल स्कूलच्या राम पुष्कराज चौधरी याला, उत्तम पुरस्कार कमल राजाराम वाणी बालनिकेतन विद्यामंदिरच्या राजरत्न रणजित पारधे याला, तर प्रशंसनीय पुरस्कार उज्ज्वल इंग्लिश मिडीयम स्कूलच्या अथर्व अतुल पाटील याला प्रदान करण्यात आला. स्पर्धेचे परीक्षण ज्येष्ठ संगीतकार दुष्यंत जोशी आणि किरण सोहळे यांनी केले. बालस्पर्धकांच्या सादरीकरणातील स्वर, लय, भाव आणि नाट्यगीताच्या अभिव्यक्तीचा बारकाईने अभ्यास करून त्यांनी गुणवत्तापूर्ण निवड केली.
विजेत्या स्पर्धकांना परीक्षकांसह बालरंगभूमी परिषदेचे अध्यक्ष योगेश शुक्ल, प्रमुख कार्यवाह विनोद ढगे, उपाध्यक्ष पंकज बारी, कोषाध्यक्ष सचिन महाजन तसेच सदस्य सुदर्शन पाटील, ज्ञानेश्वर सोनवणे आणि मोहित पाटील यांच्या हस्ते पारितोषिके प्रदान करण्यात आली. उपस्थित मान्यवरांनी सर्व विजेत्या विद्यार्थ्यांचे कौतुक करत त्यांच्या कलाप्रवासासाठी शुभेच्छा दिल्या. कार्यक्रमाचे सूत्रसंचालन विनोद ढगे यांनी प्रभावीपणे केले, तर आभार प्रदर्शन योगेश शुक्ल यांनी केले. बालकलाकारांना प्रोत्साहन देणाऱ्या अशा उपक्रमांमुळे मराठी नाट्यसंगीताची परंपरा नव्या पिढीपर्यंत पोहोचण्यास मोठी मदत होत असल्याचे मत उपस्थितांनी व्यक्त केले.
