जळगाव-लाईव्ह ट्रेंड्स न्यूज प्रतिनिधी । जळगाव शहरातील सुमारे दीडशे वर्षांची परंपरा असलेल्या मरीमातेच्या बारा गाड्या ओढण्याचा पारंपरिक सोहळा आज मोठ्या उत्साहात पार पडला. टॉवर चौकापासून भिलपुरा पोलीस चौकीशेजारील मरीमाता मंदिरापर्यंत बारा गाड्या ओढण्यात आल्या. या पारंपरिक सोहळ्याला भाविकांसह महिला, लहान मुले आणि नागरिकांची मोठी गर्दी झाली होती.
सोहळ्याच्या प्रारंभी बारा गाड्यांचे विधिवत पूजन पोलीस पाटील प्रभाकर पाटील यांच्या हस्ते करण्यात आले. त्यानंतर राहुल भगत यांनी बारा गाड्या ओढत या पारंपरिक सोहळ्याला सुरुवात केली. बारा गाड्या ओढण्यापूर्वी शहरातील विविध मरीमाता मंदिरांमध्ये जाऊन दर्शन घेण्यात आले. त्यानंतर बारा गाड्यांची फेरी काढून मुख्य सोहळ्यास प्रारंभ करण्यात आला. या पारंपरिक धार्मिक सोहळ्यामुळे टॉवर चौक परिसरापासून भिलपुरा परिसरापर्यंत भक्तिमय वातावरण निर्माण झाले होते. बारा गाड्या ओढण्याचा सोहळा पाहण्यासाठी नागरिकांनी मोठ्या संख्येने गर्दी केली होती. महिला आणि लहान मुलांची उपस्थितीही लक्षणीय होती. पारंपरिक श्रद्धा आणि उत्साहाने नागरिकांनी या सोहळ्यात सहभाग घेतला.
शहरातील दीडशे वर्षांपासून सुरू असलेल्या या परंपरेला आजही नागरिकांकडून उत्स्फूर्त प्रतिसाद मिळत असल्याचे दिसून आले. बारा गाड्यांच्या या सोहळ्यामुळे जुन्या परंपरा आणि धार्मिक श्रद्धांचा वारसा पुढील पिढ्यांपर्यंत जपला जात असल्याचे चित्र पाहायला मिळाले. सोहळ्याच्या पार्श्वभूमीवर कायदा व सुव्यवस्था अबाधित राहावी तसेच गर्दीचे योग्य नियोजन व्हावे यासाठी शहर पोलीस स्टेशन आणि शनिपेठ पोलीस स्टेशनच्या कर्मचाऱ्यांकडून मोठा पोलीस बंदोबस्त तैनात करण्यात आला होता. पोलिसांच्या उपस्थितीमुळे कार्यक्रम शांततेत आणि सुरळीत पार पडला.
