भगवान बिरसा मुंडा यांच्या जयंतीनिमित्त मंत्र्यांच्या उपस्थितीत विविध लाभांचे वितरण

या प्रभातफेरीत जिल्ह्यातील आदिवासी बांधव व भगिनी मोठ्या संख्येने पारंपरिक वेशभूषेत सहभागी झाले होते. पारंपरिक वाद्यांच्या गजरात आदिवासी नृत्य पथकांनी सादर केलेल्या लोकनृत्य, महापुरुषांचे फलक, भगवान बिरसा मुंडा यांच्या कार्याची महती सांगणारे घोषणा आणि प्रेरणादायी विचार, यांमुळे संपूर्ण जळगाव शहर दुमदुमून गेले होते. नागरिक, विद्यार्थी व विविध संघटनांच्या पदाधिकाऱ्यांच्या उत्स्फूर्त सहभागाने निघालेली ही प्रभातफेरी शहराच्या मुख्य मार्गावरून मार्गक्रमण करत जिल्हाधिकारी कार्यालयाच्या प्रांगणात पोहोचली व येथे तिचा समारोप झाला.

याप्रसंगी मान्यवरांच्या हस्ते विविध शासकीय योजनांचा लाभ वितरण व गुणवंत सत्कार सोहळा पार पडला. यामध्ये आदिवासी महिलांच्या आर्थिक सबलीकरणासाठी व स्वयंवरोगासाठी चालना देण्यासाठी महिला बचत गटांना प्रत्येकी १० हजार रुपयांचे धनादेश वितरित करण्यात आले. तसेच संजय गांधी निराधार योजनेच्या पात्र लाभार्थ्यांना मंजुरी प्रमाणपत्रांचे व विद्यार्थी व नागरिकांना जातीच्या प्रमाणपत्रांचे वाटप करण्यात आले. यासोबतच महाराष्ट्र शासनाच्या ‘पवित्र पोर्टल’द्वारे पारदर्शक प्रक्रियेतून शिक्षक म्हणून निवड होऊन रुजू झालेल्या नवर्निवाचित शिक्षकांचा विशेष सत्कार करण्यात आला. तसेच ‘पुढारी टॅलेंट सर्च’ परीक्षेत यश संपादन केलेल्या गुणवंत विद्यार्थी यांना प्रमाणपत्र देऊन गौरविण्यात आले आणि आदिवासी समाजाच्या प्रगतीसाठी व संस्कृती संवर्धनासाठी मोलाचे योगदान देणाऱ्या समाजातील सन्माननीय व्यक्तिमत्त्वांचाही मान्यवरांच्या हस्ते गौरव करण्यात आला.

अध्यक्षीय भाषणात केंद्रीय राज्यमंत्री ना. रक्षाताई खडसे यांनी ‘जनजातीय गौरव दिसा’चे राष्ट्रीय महत्त्व अधोरेखित केले. केंद्र व राज्य शासन आदिवासी समाजाच्या प्रगतीसाठी अनेक योजना राबवत असून शासन एक मजबूत ‘सपोर्ट सिस्टीम’ म्हणून काम करत आहे; परंतु जोपर्यंत समाज स्वतः पुढाकार घेत नाही, तोपर्यंत अपेक्षित प्रगती होऊ शकत नाही, असे सांगून नागरिकांनी जागरूक होऊन शिक्षण आणि योजनांचा लाभ घेण्यासाठी स्वतः पुढे यावे, असे आवाहन त्यांनी केले.

तत्पूर्वी खासदार स्मिताताई वाघ यांनीही आपल्या मनोगतून भगवान बिरसा मुंडा यांच्या जीवनावर प्रकाश टाकला व बिरसा मुंडा यांचे विचार जनसामान्यांपर्यंत पोहोचविण्यात यावे असे विचार व्यक्त केले. आदिवासी समाज हा शब्द पाळणारा आहे व अत्यंत सामान्य आहेत असे मत प्रकट करून आदिवासी बांधवांच्या जयंतीच्या शुभेच्छा दिल्या.