जळगाव-लाईव्ह ट्रेंड्स न्यूज प्रतिनिधी । जळगाव शहरात अचानक पेट्रोल शॉर्टेज होणार असल्याच्या अफवेमुळे नागरिकांमध्ये भीतीचे वातावरण निर्माण झाले असून, विविध पेट्रोल पंपांवर मोठ्या प्रमाणात गर्दी उसळल्याचे चित्र मंगळवारी सायंकाळी पाहायला मिळाले.
सायंकाळपर्यंत शहरातील परिस्थिती पूर्णपणे सुरळीत होती. मात्र, मागील दोन तासांत अचानक परिस्थितीत बदल झाला आणि नागरिकांनी पेट्रोल भरण्यासाठी पंपांकडे धाव घेतली. सोशल मीडियावर पेट्रोलचा तुटवडा निर्माण होणार असल्याचे संदेश वेगाने व्हायरल झाल्यानंतर ही गर्दी वाढल्याचे समोर आले आहे. अनेक वाहनचालकांनी संभाव्य अडचणी टाळण्यासाठी खबरदारी म्हणून पेट्रोल भरून घेण्याचा निर्णय घेतला.
याच दरम्यान शहरातील काही पेट्रोल पंप तात्पुरते बंद असल्याचेही दिसून आले, ज्यामुळे नागरिकांमध्ये भीती आणखी वाढली. बंद पंपांमुळे अफवांना अधिकच बळ मिळाले आणि उघड्या पंपांवर ताण वाढला. काही ठिकाणी वाहनांच्या लांबच लांब रांगा लागल्या होत्या, तर काही ठिकाणी किरकोळ गोंधळाचे वातावरणही निर्माण झाले.
या परिस्थितीत अनेक नागरिकांनी पेट्रोल शॉर्टेज होण्याची शक्यता लक्षात घेऊन आधीच इंधन साठवण्याचा प्रयत्न केल्याचे सांगितले. मात्र, पेट्रोल पंप चालकांनी या सर्व अफवा निराधार असल्याचे स्पष्ट करत शहरात पेट्रोलचा कोणताही तुटवडा नसल्याचे सांगितले. पुरेसा साठा उपलब्ध असून पुरवठा सुरळीत सुरू असल्याची माहिती त्यांनी दिली.
पेट्रोल पंप चालकांनी नागरिकांना शांत राहण्याचे आवाहन करत आवश्यक तेवढेच पेट्रोल घ्यावे आणि सोशल मीडियावरील अप्रमाणित संदेशांवर विश्वास ठेवू नये, असे स्पष्ट केले. तसेच अफवांमुळे निर्माण होणारी अनावश्यक गर्दी टाळण्याचेही त्यांनी आवाहन केले.
