यावल-लाईव्ह ट्रेंड्स न्यूज प्रतिनिधी । यावल तालुक्यात अन्न व औषध प्रशासन विभागाच्या तपासणी मोहिमेचा अभाव असल्याने विविध दुकानांमध्ये नियमांचे उल्लंघन होत असल्याची चर्चा नागरिकांमध्ये सुरू आहे. विशेषतः गुजरात आणि मध्य प्रदेश राज्यांच्या सीमेलगत असलेल्या यावल तालुक्यात बाहेरील भागातून येणाऱ्या खाद्यपदार्थ आणि इतर वस्तूंच्या गुणवत्तेबाबत प्रश्न उपस्थित केले जात असून, नागरिकांनी नियमित तपासणी करून नियमभंग करणाऱ्यांवर कारवाई करण्याची मागणी केली आहे.
तालुक्यातील किराणा दुकाने तसेच मोठ्या विक्री केंद्रांमध्ये अन्नपदार्थांची गुणवत्ता, साठवणूक आणि स्वच्छतेचे निकष पाळले जात आहेत का, याबाबत नागरिकांकडून चिंता व्यक्त केली जात आहे. काही ठिकाणी अस्वच्छ वातावरणात खाद्यपदार्थांची विक्री होत असल्याच्या तक्रारी समोर येत असून, भेसळयुक्त पदार्थांच्या विक्रीला आळा घालण्यासाठी प्रशासनाने अधिक सक्रिय होण्याची गरज व्यक्त केली जात आहे.
यावल तालुका गुजरात आणि मध्य प्रदेश या दोन राज्यांच्या सीमेला जोडलेला असल्याने बाहेरील भागातून विविध जीवनावश्यक वस्तू मोठ्या प्रमाणावर विक्रीसाठी आणल्या जात असल्याचे सांगितले जाते. मात्र या वस्तूंची गुणवत्ता, परवाने आणि वैधता यांची नियमित तपासणी केली जाते का, असा प्रश्न नागरिकांकडून उपस्थित केला जात आहे. तालुक्यात काही ठिकाणी प्रतिबंधित गुटख्याची विक्री सुरू असल्याच्या तक्रारीही नागरिकांकडून करण्यात येत आहेत. न्यायालयाने प्रतिबंध घातलेल्या गुटख्याची काही भागात खुलेआम विक्री होत असल्याचा आरोप असून, या प्रकारावर कठोर कारवाई करण्याची मागणी होत आहे. तसेच अन्न सुरक्षा नियमांचे उल्लंघन करणाऱ्या विक्रेत्यांवर प्रशासनाने तातडीने कारवाई करावी, अशी अपेक्षा व्यक्त केली जात आहे.
नागरिकांच्या आरोग्याशी संबंधित विषय असल्याने अन्न व औषध प्रशासन विभागाने यावल शहरासह ग्रामीण भागात विशेष तपासणी मोहीम राबवावी, अशी मागणी जोर धरत आहे. केवळ नफेखोरीच्या उद्देशाने निकृष्ट दर्जाच्या वस्तूंची विक्री होऊ नये आणि नागरिकांच्या आरोग्याशी कोणतीही तडजोड होऊ नये, यासाठी प्रशासनाने विशेष लक्ष देण्याची आवश्यकता असल्याचे नागरिकांचे म्हणणे आहे. दरम्यान, अन्न व औषध प्रशासन विभागाची जबाबदारी स्वीकारल्यानंतर राज्यात कठोर आणि प्रभावी कारवाईसाठी ओळखले जाणारे अधिकारी तुकाराम मुंढे यांच्याकडून अन्न सुरक्षेच्या बाबतीत अधिक कडक पावले उचलली जातील, अशी अपेक्षा सर्वसामान्य नागरिकांकडून व्यक्त केली जात आहे.
