यावल-लाईव्ह ट्रेंड्स न्यूज प्रतिनिधी । जळगाव येथील मूळजी जेठा महाविद्यालयाचे प्राध्यापक भूषण नवलसिंग चौधरी यांना वनस्पतीशास्त्र विषयात पीएच.डी. प्राप्त झाली आहे. मूळचे झुरखेडा, ता. धरणगाव येथील रहिवासी असलेल्या प्रा. चौधरी यांनी भेंडी पिकावरील परस्परसंकर पद्धतीचा अभ्यास करून सेंद्रिय शेतीसाठी उपयुक्त ठरू शकणाऱ्या संकरित वाणांच्या निर्मितीवर संशोधन केले आहे. त्यांच्या या शैक्षणिक यशाबद्दल परिसरातून त्यांचे अभिनंदन होत आहे.
सध्याच्या शेतीमध्ये रासायनिक खते, कीटकनाशके आणि विविध रासायनिक निविष्ठांचा मोठ्या प्रमाणावर वापर केला जातो. भेंडी पिकाच्या उत्पादनासाठीही अनेकदा रासायनिक खते व औषधांचा वापर करावा लागतो. त्यामुळे मानवी आरोग्य, जमिनीची सुपीकता आणि पर्यावरणाचे संरक्षण या दृष्टीने सेंद्रिय शेतीचे महत्त्व वाढत आहे. कमी खर्चात दर्जेदार उत्पादन मिळविण्यासोबतच विषमुक्त अन्ननिर्मितीला प्रोत्साहन देण्यासाठी सेंद्रिय शेती उपयुक्त ठरू शकते.
या पार्श्वभूमीवर प्रा. भूषण चौधरी यांनी भेंडी पिकातील परस्परसंकर पद्धतीचा अभ्यास केला. सेंद्रिय शेतीसाठी अनुकूल ठरू शकणाऱ्या संकरित वाणांच्या निर्मितीच्या शक्यतांचा शोध घेणे हा त्यांच्या संशोधनाचा प्रमुख भाग होता. या संशोधनातून सेंद्रिय शेतीसाठी उपयुक्त भेंडीचे चांगले संकरित वाण विकसित करण्याच्या दृष्टीने महत्त्वपूर्ण शक्यता समोर आल्या आहेत. त्यांच्या या अभ्यासाचा भविष्यात भेंडी पिकाच्या सुधारित वाणांच्या संशोधनासाठी उपयोग होऊ शकतो.
या संशोधनासाठी प्रा. चौधरी यांना त्यांचे संशोधन मार्गदर्शक तथा सिनेट सदस्य डॉ. जयवंत जी. मगर यांचे मोलाचे मार्गदर्शन लाभले. त्यांच्या मार्गदर्शनाखाली प्रा. चौधरी यांनी वनस्पतीशास्त्रातील संशोधन पूर्ण करून पीएच.डी. संपादन केली. प्रा. भूषण चौधरी हे झुरखेडा हायस्कूल, झुरखेडा येथील स्वर्गीय नवल प्रताप पाटील सर यांचे पुत्र आहेत. नवल प्रताप पाटील यांनी स्काऊट-गाईड शिक्षक म्हणून कार्य केले होते. तसेच ते एस. आर. चौधरी हायस्कूल, विनोद येथील निवृत्त शिक्षक कांतीलाल चौधरी यांचे पुतणे आहेत.
