यावल-लाईव्ह ट्रेंडस न्यूज प्रतिनिधी । यावल तालुक्यातील पाडळसे येथील प्रतिष्ठित ग्रामीण शिक्षण संस्था पाडळसेची सन २०२५-२६ ते २०२७-२८ या कालावधीसाठीची त्रैवार्षिक निवडणूक नुकतीच बिनविरोध पार पडली आहे. विशेष म्हणजे, संस्थेच्या सर्व पदाधिकाऱ्यांसह कार्यकारी मंडळ आणि नियामक मंडळाचे सदस्यही एकमताने निवडून आले आहेत, ज्यामुळे संस्थेतील एकजुटीचे आणि सामंजस्याचे दर्शन घडले आहे.
या निवडणुकीत संस्थेच्या अध्यक्षपदी डॉ. उदय मधुकर चौधरी यांची, तर उपाध्यक्षपदी रामराव विठ्ठल पाटील आणि चिटणीसपदी प्रवीण प्रभाकर चौधरी यांची बिनविरोध निवड करण्यात आली. संस्थेच्या या नेतृत्वावर सर्वच सदस्यांनी विश्वास दर्शवला आहे.
दरम्यान, आश्रयदाते व उपकारकर्ते या महत्त्वाच्या श्रेणीतून अरुण नेमचंद चौधरी यांची निवड झाली आहे. संस्थेच्या कारभारात आणि शैक्षणिक उपक्रमांमध्ये या नवनियुक्त पदाधिकाऱ्यांचा सक्रिय सहभाग अपेक्षित आहे. कार्यकारी मंडळ सदस्य म्हणून अनिल लिलाधर चौधरी, जयंत मुरलीधर पाटील, ललितकुमार रमेश पाटील, प्रमोद रामकृष्ण बऱ्हाटे, शरद तुकाराम बऱ्हाटे, विनायक मधुकर पाटील, योगराज डिगंबर बऱ्हाटे आणि युवराज मधुकर पाटील यांची निवड झाली आहे. हे सदस्य संस्थेच्या दैनंदिन कामकाजाची आणि विविध उपक्रमांची जबाबदारी सांभाळतील.
त्याचबरोबर, नियामक मंडळात गोपाळ पिला पाटील, रघुनाथ नारायण बऱ्हाटे आणि सोपान खेमा पाटील यांची निवड करण्यात आली आहे. संस्थेच्या धोरणात्मक निर्णयांमध्ये या सदस्यांची भूमिका महत्त्वाची असेल. एकूण १५ सदस्य बिनविरोध निवडून आले आहेत, हे संस्थेच्या कार्यक्षमतेसाठी आणि सुसंवादासाठी शुभसंकेत आहे.
या निवडणूक प्रक्रियेत एस.एल.पाटील यांनी निवडणूक निर्णय अधिकारी म्हणून यशस्वीपणे काम पाहिले, तर मयुर भगवान पाटील यांनी सहायक निवडणूक निर्णय अधिकारी म्हणून जबाबदारी सांभाळली. तसेच, श्री. किशोर अरुण नेहेते व योगेश बळिराम नेहेते यांनी मदतनीस म्हणून मोलाचे सहकार्य केले. ग्रामीण शिक्षण संस्थेची निवडणूक बिनविरोध झाल्याबद्दल नवनियुक्त अध्यक्ष डॉ. उदय मधुकर चौधरी यांनी सर्व मतदार आणि ग्रामस्थांचे मनःपूर्वक आभार व्यक्त केले आहेत.
