जळगाव-लाईव्ह ट्रेंड्स न्यूज प्रतिनिधी । जळगाव जिल्हा पोलिसांनी अंमली पदार्थांविरोधातील मोहिमेत महत्त्वपूर्ण पाऊल उचलत विविध गुन्ह्यांमध्ये जप्त करण्यात आलेल्या सुमारे १ कोटी २३ लाख ८८ हजार ४०७ रुपये किमतीच्या अंमली पदार्थांच्या मुद्देमालाचा नियमानुसार नाश केला. जिल्हाधिकारी यांच्या अध्यक्षतेखाली स्थापन करण्यात आलेल्या औषध विल्हेवाट समितीच्या मार्गदर्शनाखाली ही कारवाई पार पडली असून, अंमली पदार्थांविरोधात पोलिसांनी कठोर भूमिका कायम असल्याचा संदेश या माध्यमातून देण्यात आला.
पोलीस अधीक्षक कार्यालयाने दिलेल्या माहितीनुसार, जिल्ह्यातील विविध पोलीस ठाण्यांमध्ये दाखल असलेल्या अंमली पदार्थांशी संबंधित गुन्ह्यांमध्ये जप्त करण्यात आलेला मुद्देमाल कायदेशीर प्रक्रिया पूर्ण झाल्यानंतर नष्ट करण्यात आला. या कारवाईत गांजा, अफूची झाडे, डोडा पोस्त, एमडी (मेफेड्रोन) तसेच अन्य अंमली पदार्थांचा समावेश होता. संपूर्ण प्रक्रिया संबंधित समितीच्या उपस्थितीत आणि नियमानुसार पार पाडण्यात आली. अंमली पदार्थांच्या वाढत्या गैरवापराला आळा घालण्यासाठी जळगाव जिल्हा पोलीस सातत्याने विशेष मोहीम राबवत आहेत. अशा गुन्ह्यांमध्ये जप्त करण्यात आलेल्या मुद्देमालाची न्यायालयीन प्रक्रिया पूर्ण झाल्यानंतर त्याची सुरक्षित विल्हेवाट लावणे आवश्यक असते. त्यानुसार शासनाच्या नियमांचे पालन करून ही कारवाई करण्यात आल्याची माहिती पोलिसांकडून देण्यात आली.
पोलीस प्रशासनाने नागरिकांना अंमली पदार्थांच्या अवैध विक्री, साठवणूक किंवा वाहतुकीची माहिती मिळाल्यास तात्काळ पोलिसांशी संपर्क साधण्याचे आवाहन केले आहे. समाजातील युवकांना अंमली पदार्थांच्या विळख्यातून दूर ठेवण्यासाठी जनजागृतीसह कठोर कायदेशीर कारवाई सुरूच राहणार असल्याचेही स्पष्ट करण्यात आले. जिल्ह्यात अंमली पदार्थांच्या विरोधात सुरू असलेल्या मोहिमेमुळे अशा अवैध व्यवसायांना मोठा आळा बसण्यास मदत होणार असून, पोलिसांच्या या कारवाईचे विविध स्तरातून स्वागत होत आहे. भविष्यातही अशाच प्रभावी कारवाया सुरू ठेवण्याचा निर्धार पोलीस प्रशासनाने व्यक्त केला आहे.
ही कारवाई पोलीस अधीक्षक श्रीकांत धिवरे यांच्या अध्यक्षतेखाली स्थापन जिल्हास्तरीय अंमली पदार्ध नाश समिती मधील सदस्य अपर पोलीस अधीक्षक संदीप गावित, पोलीस उपअधीक्षक संजय गायकवाड, अधीक्षक कृषी विभाग यांचे प्रतिनिधी विकास बोरसे , निरीक्षक वजन मापे गौतम बाविस्कर यांच्या उपस्थितीत स्थानिक गुन्हे शाखा पो. नि. राहूल गायकवड यांच्या मार्गदशनाखाली स. फौ. संजय दोरकर, पोहेकॉ संदीप पाटील, संदीप चव्हाण, जयंत चौधरी, राहुल बैसाणे यांच्या पथकाने केली.
