जळगाव-लाईव्ह ट्रेंडस न्यूज प्रतिनिधी । जळगाव शहरातील पिंप्राळा येथे राहणाऱ्या एका व्यापाऱ्याला दिलेल्या पैशांच्या ५ ते ६ पट रक्कम वाढवून परत देण्याचे अमिष दाखावत पुतणीचा पती व त्याचा भाऊ यांनी तब्बल ४८ लाख ५६ हजार रुपयांची फसवणूक केल्याचा धक्कादायक प्रकार समोर आला आहे. पैसे मागितल्यावर त्यांना जीवे ठार मारण्याची धमकी देखील दिली आहे. या संदर्भात बुधवारी ११ नोव्हेंबर रोजी दुपारी ३ वाजता रामानंदनगर पोलीस ठाण्यात दोन जणांविरुद्ध गुन्हा दाखल करण्यात आला आहे.
या संदर्भात अधिक माहिती अशी की, गोपाल प्रभुलाल राठी वय-६३, रा. पिंप्राळा, जळगाव हे आपल्या परिवारासह वास्तव्याला आहेत. राठी यांची एमआयडीसीमध्ये कंपनी होती, ते त्यांनी सन २०१८-१९ मध्ये विकली होती. त्यासाठी त्यांना ८८ लाख रुपये मिळाले होते. गोपाल राठी यांच्याकडे पैसे असल्याची माहिती पुतणी वर्षा विजय मंडोरे, जवाई विजय जगदीश मंडोरे आणि जवाईचा भाऊ लक्ष्मीनारायण मंडोरे यांच्याकडे होती. दरम्यान पुतणी वर्षा आणि जावई विजय मंडोरे यांनी सन-२०१६ मध्ये सव्वा दोन लाख रुपये उसनवारीने घेतले होते, ते त्यांनी सहा महिन्यांनी परत केले होते. त्यानंतर फेब्रुवारी २०१८ मध्ये पुन्हा घर घेण्यासाठी त्यांनी २ लाख रुपये गोपाल राठी यांच्याकडून घेतले होते, परंतु दिलेले दोन लाख रुपये रक्कम परत दिलेले नाही. दरम्यान पुतणी वर्षा मंडोरे या वकिली व्यवसायक असल्याने त्यांचा कामाचा व्याप पाहून जवाई विजय मंडोरे व जावईचा भाऊ लक्ष्मीनारायण मंडोरे यांनी तिला मदत करण्यासाठी भूसंपादनाच्या केसेसमध्ये सहकार्य करत होते. जावई आणि पुतणी यांनी काही लोकांकडून पैसे घेतलेले होते. दरम्यान पुतणी वर्षा मंडोरे आणि जवाई विजय मंडोरे यांनी राठी यांना सांगितले की, तुम्ही आम्हाला पैसे दिले तर दिलेल्या पैशांच्या रकमेच्या ५ ते ६ पट रक्कम परत देऊ. यावर गोपाल राठी यांचा विश्वास बसला नाही, त्यानंतर पुन्हा वर्षा मंडोरे आणि लक्ष्मीनारायण मंडोरे यांनी यांना मध्यस्थी करून पैसे देण्याबाबत जवाई विजय मंडोरे याचा प्रयत्न सुरू होता. दरम्यान पाच ते सहा पट पैसे कसे मिळतील याच्या हिशोब त्यांनी सांगितला. तरीदेखील राठी यांनी पैसे देण्यास नकार दिला परंतु त्यांनी जास्त दबाव टाकल्याने त्यांनी थोडा वेळ मागून घेतला.
दरम्यान, विजय मंडोरे हे पैसे घेण्यासाठी राठी यांच्या घरी आले होते. त्यावेळी विजय म्हणाला की, तुमचे पैसे कुठे जाणार नाही, हा घरचा विषय आहे, आम्ही बाहेरच्या लोकांना लाखो रुपये कमवून देतो, तुम्ही तर माझ्या पत्नीचे काका आहात, तुमच्याकडे असेही काही पैसे बँकेत पडून आहे, एका वर्षात तुम्हाला ५० लाखांचे कमीत कमी ३ कोटी रुपये कमवून देऊ, असे सांगत काही रक्कम कॅश आणि काही रक्कम बँकेतून देण्याचे सांगितले. दरम्यान याच्यावर विश्वास ठेवून राठी यांनी वेळोवेळी त्यांना ऑनलाईन, आरटीजीएस आणि चेक स्वरूपात तब्बल ४८ लाख ५६ हजार रुपये विजय मंडोरे आणि लक्ष्मीनारायण मंडळी यांना दिले. दरम्यान राठी यांनी सांगितले की, मी ज्या रक्कम तुम्हाला दिले आहेत, त्याचे काही एग्रीमेंट किंवा सेक्युरिटी चेक्स द्या, तेव्हा जावई विजय मंडोरे यांनी सांगितले की, आपण एक परिवार आहोत, तुमची पुतणी माझी बायको आहे, तुम्हीच तिला लहानशी मोठी केली आहे, तुमची कुठलीही फसवणूक होणार नाही अशी खात्री दिली. दरम्यान विजय मंडोरे आणि त्याचा भाऊ लक्ष्मीनारायण मंडळ यांनी वर्षभरात कोणतीही रक्कम दिली नाही. त्यामुळे १४ ऑगस्ट २०२२ रोजी ते नाशिक येथे मंडोरे यांच्या घरी गेले असता. त्यावेळी तिघांनी पैसे परत करण्यासाठी वेळ मागून घेतली. काही दिवसानंतर पुतणी वर्षा मंडोरे यांचे निधन झाले. त्यानंतर त्यांनी सहा महिने पैसे मागितले नाही. त्यानंतर डिसेंबर २०२३ पासून त्यांनी पैशांची मागणी केली असता त्यांना हुलकावून लावले आणि जीवे ठार मारण्याची धमकी तसेच तुमचे पैसे बुडाले आहे, असे सांगून विजय जगदीश मंडोरे आणि लक्ष्मीनारायण मंडळ यांनी फसवणूक केली. दरम्यान आपली फसवणूक झाल्याचे लक्षात आल्यानंतर गोपाल राठी यांनी अखेर बुधवारी ११ डिसेंबर रोजी रामानंदनगर पोलीस ठाण्यात तक्रार दिली. त्यांनी दिलेल्या तक्रारीवरून जवाई विजय जगदीश मंडोरे आणि त्याचा भाऊ लक्ष्मीनारायण जगदीश मंडळ दोन्ही राहणार पिंप्राळा यांच्या विरोधात फिर्यादीने त्यानुसार गुन्हा दाखल करण्यात आला आहे.
