जळगाव- लाईव्ह ट्रेंड्स न्यूज प्रतिनिधी | जळगाव शहरापासून जवळ असलेल्या खेडी फाट्याजवळ भुसावळकडून जळगावकडे येणारा एका दुचाकीस्वराला अज्ञात ट्रकने चिरडल्याची धक्कादायक घटना घडली आहे. या अपघातात दुचाकीस्वार तरुण जागीच ठार झाला आहे. महेंद्र एकनाथ बोंडे (वय ३८, रा. गणेश कॉलनी, भुसावळ) असे मयत झालेल्या दुचाकीस्वाराचे नाव आहे.
या संदर्भात अधिक माहिती अशी की, महेंद्र बोंडे हा तरुण आपल्या आई-वडील यांच्यासह भुसावळ शहरातील गणेश कॉलनीत वास्तव्याला होता. तो जळगाव येथील एमआयडीसीतील गणेश अल्युमिनियम कंपनीमध्ये कामाला होता. दररोज भुसावळ ते जळगाव असा दुचाकीने अपडाऊन करत होता. नेहमीप्रमाणे शनिवारी २९ मार्च रोजी सकाळी महेंद्र हा दुचाकीने भुसावळकडून जळगावला येण्यासाठी निघाला. जळगाव खेडी फाट्याजवळ अज्ञात ट्रकने त्याला जोरदार धडक दिली. त्यामुळे तो रोडवर पडला आणि त्याला ट्रकने चिरडले. त्यात महेंद्र बोंडे हे जागीच ठार झाले.
अपघात घडल्यानंतर ट्रक चालक ट्रक घेऊन पसार झाला. घटनेची माहिती मिळाल्यानंतर एमआयडीसी पोलीस ठाण्याचे पोलीस कर्मचाऱ्यांनी घटनास्थळी दाखल झाले. पंचनामा करून मृतदेह जिल्हा शासकीय वैद्यकीय महाविद्यालयात दाखल करण्यात आला. यावेळी नातेवाईकांनी जिल्हा रुग्णालयात धाव घेतली होती. दरम्यान एकुलता एक मुलगा गेल्याने नातेवाईकांनी जिल्हा रुग्णालयात एकच आक्रोश केला होता. दरम्यान या घटनेबाबत एमआयडीसी पोलीस ठाण्यात नोंद घेण्याचे काम सुरू होते.
