मुंबई-वृत्तसेवा । देशातील सर्वात मोठी सार्वजनिक बँक असलेल्या State Bank of India अर्थात SBI च्या ग्राहकांसाठी महत्त्वाची माहिती समोर आली आहे. आगामी काही दिवसांत बँकेच्या शाखा सलग सहा दिवस बंद राहण्याची शक्यता व्यक्त करण्यात येत असून त्यामुळे ग्राहकांनी आपली बँकिंग कामे वेळेत पूर्ण करण्याचे आवाहन करण्यात आले आहे. विशेष म्हणजे शाखा सेवा बंद राहिल्यास रोख व्यवहार, पासबुक अपडेट, चेक क्लिअरन्स आणि इतर प्रत्यक्ष बँकिंग कामांवर परिणाम होऊ शकतो.
मिळालेल्या माहितीनुसार, 23 मे 2026 पासून विविध कारणांमुळे SBI च्या शाखांचे कामकाज विस्कळीत होण्याची शक्यता आहे. चौथा शनिवार, रविवार, प्रस्तावित कर्मचारी संप आणि बकरीद निमित्त जाहीर करण्यात आलेल्या सुट्ट्या यामुळे सलग अनेक दिवस शाखा बंद राहू शकतात. त्यामुळे ग्राहकांनी तातडीची आर्थिक कामे, रोख रक्कम काढणे, डिमांड ड्राफ्ट, चेक व्यवहार किंवा अन्य शाखेशी संबंधित कामे 23 मेपूर्वी पूर्ण करून घ्यावीत, असा सल्ला देण्यात येत आहे.
23 मे रोजी महिन्याचा चौथा शनिवार असल्याने देशभरातील बँका नियमित सुट्टीमुळे बंद राहतील. त्यानंतर 24 मे रोजी रविवार असल्याने शाखांचे कामकाज होणार नाही. यामुळे सलग दोन दिवस ग्राहकांना शाखा सेवा मिळणार नाहीत. त्यानंतर 25 आणि 26 मे रोजी SBI स्टाफ फेडरेशनने प्रस्तावित संपाची घोषणा केली आहे. या संपामागे राष्ट्रीय निवृत्तीवेतन प्रणाली (NPS) फंड व्यवस्थापक भरती, जॉब आउटसोर्सिंग, कर्मचाऱ्यांच्या सेवा अटी, करिअर प्रगती योजना आणि इतर प्रलंबित मागण्या असल्याचे सांगितले जात आहे.
याशिवाय, Reserve Bank of India अर्थात RBI च्या सुट्टीच्या कॅलेंडरनुसार जम्मू-काश्मीरमध्ये बकरीद निमित्त 27 आणि 28 मे रोजी बँकांना सुट्टी जाहीर करण्यात आली आहे. त्यामुळे काही भागांमध्ये सलग सहा दिवस शाखांचे कामकाज प्रभावित होऊ शकते. ही परिस्थिती इतर राज्यांमध्येही परिणामकारक ठरू शकते, अशी चर्चा बँकिंग वर्तुळात सुरू आहे.
दरम्यान, ग्राहकांसाठी दिलासादायक बाब म्हणजे ऑनलाइन सेवा सुरळीत सुरू राहणार आहेत. नेट बँकिंग, मोबाइल बँकिंग, यूपीआय व्यवहार, एटीएम सेवा आणि डिजिटल पेमेंट सेवा पूर्ववत सुरू राहतील. त्यामुळे डिजिटल व्यवहार करणाऱ्या ग्राहकांना मोठा अडथळा येण्याची शक्यता कमी आहे. मात्र, शाखेत जाऊन करावी लागणारी कामे रखडू शकतात.
बँक कर्मचारी संघटनांनी त्यांच्या विविध मागण्यांकडे प्रशासनाने गांभीर्याने लक्ष द्यावे, अशी मागणी केली आहे. SBI मधील कर्मचाऱ्यांच्या कामाच्या अटी, समानता, मानव संसाधन व्यवस्थापन प्रणाली आणि पदोन्नतीसंदर्भातील मुद्द्यांवर संघटनांनी नाराजी व्यक्त केली आहे. या पार्श्वभूमीवर संपाची हाक देण्यात आल्याने देशभरातील ग्राहकांमध्ये चिंता वाढली आहे.
