मुक्ताईनगर-लाईव्ह ट्रेंडस न्यूज प्रतिनिधी । मुक्ताईनगर शहरातील रस्त्यांवर सध्या मोकाट गुरांचा सुळसुळाट आणि अवजड वाहनांची अनियंत्रित वाहतूक यामुळे नागरिकांना जीव मुठीत धरून प्रवास करावा लागत आहे. यामुळे मोठा अपघात होण्याची शक्यता निर्माण झाली असून, नगरपंचायत आणि पोलीस प्रशासनाचे याकडे होत असलेल्या दुर्लक्षामुळे नागरिकांमध्ये तीव्र संताप व्यक्त होत आहे.
गेल्या कित्येक वर्षांपासून मुक्ताईनगरमधील नागरिकांनी अवजड वाहतुकीला विरोध दर्शवला आहे, मात्र परिस्थितीत कोणतीही सुधारणा झालेली नाही. त्यातच आता रस्त्यांवर मोकाट गुरांचा वावर वाढल्याने पायी चालणेही कठीण झाले आहे. यामुळे वाहतूक कोंडी आणि अपघातांचा धोका मोठ्या प्रमाणात वाढला आहे.
शहरातील नागरिकांनी या समस्येबाबत नगरपंचायत आणि पोलीस प्रशासनाकडे वारंवार तक्रारी केल्या आहेत. अवजड वाहनांवर नियंत्रण आणणे आणि मोकाट गुरांना रस्त्यावरून हटवणे यासाठी नगरपंचायत व पोलीस प्रशासनाने तातडीने लक्ष देण्याची गरज आहे, अशी मागणी नागरिक करत आहेत. मात्र, प्रशासनाकडून या तक्रारींकडे दुर्लक्ष केले जात असल्याचा आरोप नागरिक करत आहेत.
“एखादा मोठा अपघात झाल्यावरच प्रशासन जागे होईल का?” असा संतप्त सवाल आता मुक्ताईनगरमधील नागरिक विचारत आहेत. प्रशासनाच्या या उदासीन धोरणामुळे नागरिकांमध्ये भीतीचे वातावरण आहे. स्थानिक प्रशासनाने या गंभीर समस्येकडे त्वरित लक्ष घालून तातडीने उपाययोजना कराव्यात, अशी मागणी जोर धरू लागली आहे, जेणेकरून संभाव्य अपघात टाळता येतील आणि नागरिकांचा जीव सुरक्षित राहील.
