मुक्ताईनगर-लाईव्ह ट्रेंड्स न्यूज प्रतिनिधी । अधिक मासानिमित्त शिरसाळा येथे दर्शनासाठी जाणाऱ्या भाविकांच्या सुरक्षिततेचा प्रश्न निर्माण करणारी धक्कादायक घटना मुक्ताईनगर शहरात घडली. भरधाव वेगाने जाणाऱ्या ट्रक चालकाने दुचाकीस्वारांना जोरदार कट मारल्याने मोठा अपघात होण्याची शक्यता निर्माण झाली होती. मात्र, दुचाकीस्वारांनी प्रसंगावधान राखल्याने सुदैवाने मोठी दुर्घटना टळली.
प्राप्त माहितीनुसार, शिरसाळा येथे दर्शनासाठी आलेल्या भाविकांच्या गर्दीतून जात असताना एका ट्रक चालकाने निष्काळजीपणे वाहन चालवत दुचाकीस्वारांना धोकादायक कट मारला. या प्रकारामुळे दुचाकीस्वार संतप्त झाले. त्यांनी ट्रकचा पाठलाग करून मुक्ताई चौक-बोदवड चौफुली परिसरात ट्रक अडवला. ट्रक थांबवल्यानंतर चालकाला खाली उतरून जाब विचारण्याचा प्रयत्न करण्यात आला. मात्र, चालकाने वाहनातून बाहेर येण्यास नकार दिल्याचे प्रत्यक्षदर्शींनी सांगितले. त्यामुळे घटनास्थळी मोठी गर्दी जमली आणि काही काळ तणावाचे वातावरण निर्माण झाले.
नागरिकांच्या म्हणण्यानुसार, चालकाच्या संशयास्पद वर्तनामुळे ट्रकची तपासणी करणे आवश्यक होते. मात्र, काही स्थानिक व्यक्तींनी मध्यस्थी करत चालकाचा मोबाईल क्रमांक घेतल्यानंतर ट्रकला पुढे जाण्यास परवानगी देण्यात आल्याची माहिती समोर आली आहे. या प्रकारामुळे नागरिकांमध्ये अनेक प्रश्न उपस्थित झाले आहेत. ट्रकची तपासणी का करण्यात आली नाही? चालक वाहनातून बाहेर येण्यास का टाळाटाळ करत होता? ट्रकमध्ये नेमका कोणता माल होता? याबाबत शहरात चर्चा सुरू झाली आहे. दरम्यान, घटनेची माहिती देण्यासाठी नागरिकांनी पोलिसांना संपर्क साधण्याचा प्रयत्न केला असल्याचे सांगितले जात आहे. मात्र, पोलीस वेळेत घटनास्थळी पोहोचले नसल्याने नागरिकांमध्ये नाराजी व्यक्त होत आहे.
या घटनेनंतर मुक्ताईनगर शहरातील वाहतूक व्यवस्था आणि कायदा-सुव्यवस्थेच्या प्रश्नावर पुन्हा चर्चा सुरू झाली आहे. संबंधित ट्रक चालकाची चौकशी करून संपूर्ण घटनेचा तपास करण्यात यावा, अशी मागणी नागरिकांकडून होत आहे.
“कट मारून अपघाताचा प्रयत्न की अन्य काही कारण?”
ट्रक चालकाच्या वर्तनामुळे आणि ट्रकची तपासणी न झाल्याने नागरिकांच्या मनात संशय निर्माण झाला असून, प्रशासनाने या प्रकरणाची गांभीर्याने दखल घेऊन सत्य परिस्थिती समोर आणावी, अशी मागणी होत आहे.
