पाचोरा- लाईव्ह ट्रेंड्स न्यूज प्रतिनिधी । पाचोरा तालुक्यातील गोराडखेडा गावानजीक असलेल्या पी. जे. रेल्वे लाईन जवळ २६ ऑक्टोबर २०२५ रोजी रात्री ९:३० वाजेच्या सुमारास लक्झरी बस आणि चारचाकी कार यांची समोरासमोर धडक होवून भीषण अपघात घडला. या अपघातात कोणतीही जिवितहानी होवू नसल्यानं, सुदैवाने मोठा अनर्थ टळला. तथापि, कारमधील प्रवाशी किरकोळ जखमी झाले आहेत.
सदर अपघात जळगावहून पुण्याला जात असलेल्या लक्झरी बस (क्रं. एम. पी. १३ पी. ६१७१) आणि पाचोऱ्याहून नेरीला जाणाऱ्या चारचाकी कार (क्रं. एम. एच. ४१ बी. ई. २२९४) यांच्यात घडला. पी. जे. रेल्वे लाईन जवळ रस्त्याच्या मधोमध मोठे खड्डे पडलेले होते, ज्यामुळे अपघात घडला. खड्ड्यात कार आदळली आणि समोरून येणाऱ्या लक्झरी बसला जोरदार धडक दिली. या अपघातामुळे कारचा पुढील भाग चक्काचूर झाला, तसेच लक्झरी बसच्या ड्रायव्हर साईडचे टायर फुटले. त्यामुळे त्या बाजूचे गंभीर नुकसान झाले.
लक्झरी बसमधून २० प्रवासी प्रवास करत होते, मात्र या सर्वांना काहीही दुखापत झाली नाही. कारमधील प्रवासी जखमी झाले असून त्यांना तातडीने उपचारासाठी जवळच्या रुग्णालयात दाखल करण्यात आले. अपघाताची माहिती मिळताच स्थानिक प्रशासन आणि पोलिसांनी घटनास्थळी धाव घेतली आणि अपघातग्रस्त वाहनांची व स्थानिक रस्त्याची तपासणी केली.
गोराडखेडा गावानजीक असलेल्या रस्त्यावर पडलेल्या मोठ्या खड्ड्यामुळे या अपघाताला कारणीभूत ठरले. स्थानिक रस्त्याच्या खराब स्थितीमुळे भविष्यात अशा प्रकारच्या अपघातांचे प्रमाण वाढण्याची शक्यता आहे. त्यामुळे संबंधित विभागांनी या रस्त्याची तातडीने दुरुस्ती करणे आवश्यक आहे, अशी अपेक्षा स्थानिक नागरिकांनी व्यक्त केली आहे.
