धरणगाव लाईव्ह ट्रेंडस न्यूज प्रतिनिधी । मित्राच्या वाढदिवसाचा केक घेण्यासाठी दुचाकीने जात असतांना सोमवारी १६ डिसेंबर रोजी सायंकाळी ७ वाजता समोरासमोर झालेल्या भीषण अपघातात सहाजण गंभीर जखमी झाले होते. यातील गारखेडा येथील नववीत शिकणाऱ्या मुलाचा उपचारादरम्यान मंगळवारी १७ डिसेंबर रोजी दुपारी ३ वाजता मृत्यू झाला आहे. एकुलत्या एक मुलाचा मृत्यू झाल्याने आईवडीलांनी एकच आक्रोश केल्याचे पहायला मिळाले. प्रथमेश सुधाकर पाटील वय १५ रा. गारखेडा ता.धरणगाव असे मयत झालेल्या मुलाचे नाव आहे.
याबाबत अधिक माहिती अशी की, प्रथमेश सुधाकर पाटील हा आपल्या आईवडीलासंह गारखेडा गावात वास्तव्याला होता. मित्राचा वाढदिवस असल्याने प्रथमेश हा वैभव विठ्ठल देशमुख, हितेश भगवान भोई, शिवराज पंकज पाटील हे इयत्ता नववीत शिकणारे चौघे मित्र धरणगाव येथे केक घेण्यासाठी सोमवारी १६ डिसेंबर रोजी सायंकाळी ७ वाजता दुचाकीने धरणगावकडे निघाले होते. धरणगाव ते गारखेडा रस्त्यावरून जात असतांना समोरून येणारी दुचाकी यांची समोरासमोर जोरदार धडक झाली. या अपघातात प्रथमेशसह त्यांचे चौघे मित्र आणि समोरील दुचाकीवरील शेखर जितेंद्र महाजन तसेच गायत्री जितेंद्र महाजन हे भाऊ-बहीण जखमी झाली. यातील प्रथमेश सुधाकर पाटील हा गंभीर जखमी झाल्याने त्याला जळगाव येथील रूग्णालयात दाखल केले असता त्याचा उपचारादरम्यान मृत्यू झाला. एकुलत्या एक मुलाचा मृत्यू झाल्याने नातेवाईकांनी एकच आक्रोश केल्याचे दिसून आले.
