जळगाव लाईव्ह ट्रेंडस न्यूज प्रतिनिधी । उन्हाळी हंगाम २०२४-२५ साठी शेतकऱ्यांनी ‘ई-पीक पाहणी’ मोबाईल ॲपद्वारे करावयाच्या पीक नोंदणीसाठी राज्य शासनाने सात दिवसांची मुदतवाढ दिली आहे. यामुळे आता सहायक स्तरावरून पीक नोंदणी करण्याची अंतिम तारीख ६ जुलै २०२५ पर्यंत वाढवण्यात आली आहे.
गडचिरोली जिल्ह्यासह राज्यातील विविध भागांमध्ये भौगोलिक आणि तांत्रिक अडचणींमुळे काही शेतकऱ्यांना पीक नोंदणी करण्यास अडचणी येत होत्या. ही बाब लक्षात घेऊन राज्य शासनाने हा निर्णय घेतला असून, मा. जमाबंदी आयुक्त, पुणे यांच्यामार्फत या मुदतवाढीस मान्यता मिळाली आहे.
‘ई-पीक पाहणी’ नोंदणी शेतकऱ्यांसाठी अत्यंत महत्त्वाची आहे. यामुळे शेतकऱ्यांना अचूक पीकदाखला, पीकविमा योजना, अनुदान आणि नैसर्गिक आपत्तीमुळे झालेल्या नुकसानीसाठी भरपाई मिळण्यास मदत होते. हे ॲप वापरण्यास सोपे असून, शेतकरी घरबसल्या आपल्या शेती आणि पीकविषयक माहितीची अचूक नोंद शासनाच्या प्रणालीत करू शकतात.
शासनाच्या विविध योजनांचा लाभ घेण्यासाठी आणि संरक्षणासाठी ई-पीक नोंदणी आवश्यक आहे. त्यामुळे, ज्या शेतकऱ्यांनी अद्याप नोंदणी केली नाही, त्यांनी या संधीचा फायदा घेऊन लवकरात लवकर आपली पीक नोंदणी पूर्ण करावी, असे आवाहन प्रशासनाने केले आहे.
