जळगाव-लाईव्ह ट्रेंडस न्यूज प्रतिनिधी । जळगाव शहरातील शासकीय वैद्यकीय महाविद्यालय व रुग्णालयात एका धक्कादायक प्रकार घडला आहे. रुग्णावर व्यवस्थित उपचार होत नसल्याचा आरोप करत नातेवाईकांनी वैद्यकीय अधिकाऱ्याला मारहाण केली आहे. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
शनिवारी रात्री १०.३० वाजता ही घटना घडली. रुग्णालयातील अतिदक्षता विभागात सिध्दार्थ भिमराव जाधव यांच्यावर उपचार सुरू आहेत. त्यांच्या नातेवाईकांनी डॉक्टरांना मारहाण केली.
या मारहाणीत डॉ. जाहेद पठाण यांना चापटाबुक्क्यांनी मारहाण करण्यात आली, असे फिर्यादीत म्हटले आहे. या प्रकरणी डॉ. इमरान नजीम पठाण यांनी जिल्हापेठ पोलीस ठाण्यात फिर्याद दाखल केली आहे. त्यानुसार विक्की केजकर (रा. भुसावळ) याच्यावर गुन्हा दाखल करण्यात आला आहे. पुढील तपास पोलीस उपनिरीक्षक भारती देशमुख करत आहेत.
