जळगाव-लाईव्ह ट्रेंड्स न्यूज प्रतिनिधी । जळगाव तालुक्यातील फेसर्डी गावातील नागरिकांना सार्वजनिक वितरण प्रणालीअंतर्गत धान्य मिळवण्यासाठी करावी लागणारी सुमारे ५ किलोमीटरची पायपीट थांबवण्यासाठी गावात स्वतंत्र स्वस्त धान्य दुकान मंजूर करण्यात यावे, अशी मागणी महाराष्ट्र नवनिर्माण सेनेच्या वतीने करण्यात आली आहे. याबाबत मनसेच्या पदाधिकाऱ्यांनी जिल्हा पुरवठा अधिकाऱ्यांना निवेदन देऊन तातडीने कार्यवाही करण्याची मागणी केली.
फेसर्डी गावाची लोकसंख्या सुमारे ५०० असून, गावात अद्याप स्वतंत्र स्वस्त धान्य दुकानाची सुविधा उपलब्ध झालेली नाही. त्यामुळे सार्वजनिक वितरण प्रणालीअंतर्गत मिळणारे तांदूळ, गहू तसेच इतर जीवनावश्यक धान्य घेण्यासाठी ग्रामस्थांना जवळपास पाच किलोमीटर अंतरावरील नंदगाव येथे जावे लागत आहे. त्यामुळे शासनाकडून मिळणारे धान्य मिळवण्यासाठीच ग्रामस्थांना अतिरिक्त प्रवास करावा लागत असल्याचे निवेदनात नमूद करण्यात आले आहे. या गैरसोयीचा सर्वाधिक परिणाम गरीब व गरजू कुटुंबांवर होत आहे. शेतमजूर, रोजंदारीवर काम करणारे नागरिक, महिला, वयोवृद्ध तसेच दिव्यांग लाभार्थ्यांना धान्य घेण्यासाठी नंदगावपर्यंत ये-जा करणे त्रासदायक ठरत आहे. धान्य मिळवण्यासाठी लागणारा अतिरिक्त वेळ तसेच ये-जा करण्याचा खर्च यामुळे लाभार्थ्यांवर आर्थिक व मानसिक भार पडत असल्याचे मनसेने प्रशासनाच्या निदर्शनास आणून दिले आहे. फेसर्डी गावाची लोकसंख्या, सार्वजनिक वितरण प्रणालीतील लाभार्थ्यांची संख्या आणि सध्याच्या स्वस्त धान्य दुकानाचे गावापासून असलेले अंतर लक्षात घेता स्वतंत्र दुकानाची आवश्यकता असल्याचा दावा मनसेने केला आहे. गावातील नागरिकांना त्यांच्या हक्काचे धान्य सहज आणि वेळेत उपलब्ध व्हावे, यासाठी स्थानिक पातळीवरच स्वस्त धान्य दुकानाची सुविधा असणे गरजेचे असल्याचे निवेदनात म्हटले आहे.
यासाठी प्रशासनाने फेसर्डी गावाची प्रत्यक्ष पाहणी करून परिस्थितीची आवश्यक चौकशी करावी. तसेच शासनाच्या नियमानुसार स्वतंत्र स्वस्त धान्य दुकान मंजूर करण्यासाठी आवश्यक ती कार्यवाही तातडीने सुरू करावी, अशी मागणी मनसेच्या वतीने जिल्हा पुरवठा अधिकाऱ्यांकडे करण्यात आली आहे. निवेदन देतेवेळी मनसे जिल्हाध्यक्ष ॲड. जमील देशपांडे, उपमहानगर अध्यक्ष श्रीकृष्ण मेंगडे, प्रदीप पाटील आणि राजेंद्र निकम उपस्थित होते. प्रशासनाने या मागणीची दखल घेऊन फेसर्डी ग्रामस्थांची गैरसोय दूर करण्यासाठी सकारात्मक निर्णय घ्यावा, अशी अपेक्षा व्यक्त करण्यात आली आहे.
