जळगाव-लाईव्ह ट्रेंड्स न्यूज प्रतिनिधी । अक्कलकुवा येथील जवाहर नवोदय विद्यालयाच्या वसतिगृहात शिक्षण घेणाऱ्या निहारिका कोळी या विद्यार्थिनीच्या संशयास्पद मृत्यूप्रकरणी आता कोळी समाज बहुउद्देशीय प्रतिष्ठान आक्रमक झाले आहे. निहारिकाच्या मृत्यूची सीबीआयमार्फत तात्काळ आणि निष्पक्ष चौकशी करण्यात यावी, तसेच या प्रकरणात निष्काळजीपणा करणाऱ्या संबंधित कर्मचारी व व्यवस्थापनावर कठोर कारवाई करावी, अशी मागणी प्रतिष्ठानच्या वतीने करण्यात आली आहे.
निहारिका कोळीच्या मृत्यूमागील नेमके कारण स्पष्ट होणे आवश्यक असून, संपूर्ण घटनेची सखोल चौकशी करून सत्य परिस्थिती समोर आणावी, अशी भूमिका कोळी समाज बहुउद्देशीय प्रतिष्ठानने मांडली आहे. या प्रकरणात विद्यार्थिनीच्या मृत्यूस कारणीभूत ठरलेल्या कर्मचाऱ्यांची तसेच संबंधित व्यवस्थापनाची जबाबदारी निश्चित करून त्यांच्यावर कायदेशीर कारवाई करण्यात यावी, अशी मागणी निवेदनाद्वारे करण्यात आली आहे. वसतिगृहात विद्यार्थिनींच्या सुरक्षेची जबाबदारी असताना संबंधितांकडून निष्काळजीपणा झाला असल्यास त्याची गंभीर दखल घेणे आवश्यक आहे. त्यामुळे दोषी आढळणाऱ्या कर्मचाऱ्यांवर मनुष्यवधाचा गुन्हा दाखल करण्यात यावा, अशी मागणी करण्यात आली आहे. या प्रकरणाची चौकशी कोणत्याही दबावाशिवाय आणि पारदर्शक पद्धतीने होऊन निहारिकाच्या कुटुंबीयांना न्याय मिळावा, अशी अपेक्षाही प्रतिष्ठानने व्यक्त केली आहे. दरम्यान, आदिवासी व मागासवर्गीय विद्यार्थ्यांच्या शैक्षणिक संस्थांमधील सुरक्षितता आणि अडचणींसाठी स्वतंत्र सेल स्थापन करण्याची मागणीही करण्यात आली आहे. अशा विद्यार्थ्यांना शिक्षण घेताना कोणत्याही प्रकारच्या अडचणी किंवा अन्यायाला सामोरे जावे लागू नये, यासाठी संस्थात्मक पातळीवर स्वतंत्र यंत्रणा असावी, अशी भूमिका प्रतिष्ठानने घेतली आहे.
वसतिगृहातील मुलींच्या सुरक्षेचा मुद्दाही या निवेदनातून उपस्थित करण्यात आला आहे. विद्यार्थिनींच्या सुरक्षिततेसाठी स्वतंत्र पोलीस यंत्रणा उभारावी, तसेच वसतिगृहांमध्ये सुरक्षा व्यवस्थेचे नियमित परीक्षण करण्यात यावे, अशी मागणी करण्यात आली आहे. विद्यार्थिनींच्या सुरक्षेबाबत कोणतीही तडजोड होऊ नये आणि भविष्यात अशा घटना टाळण्यासाठी ठोस उपाययोजना करण्यात याव्यात, अशी अपेक्षा व्यक्त करण्यात आली आहे. निहारिका कोळीच्या मृत्यूची सीबीआय चौकशी, संबंधित कर्मचाऱ्यांवर कायदेशीर कारवाई, विद्यार्थिनींच्या सुरक्षेसाठी स्वतंत्र पोलीस यंत्रणा आणि आदिवासी व मागासवर्गीय विद्यार्थ्यांसाठी स्वतंत्र सेल या मागण्या तातडीने मान्य कराव्यात, अशी मागणी प्रतिष्ठानने केली आहे. या मागण्यांकडे प्रशासनाने गांभीर्याने लक्ष न दिल्यास तीव्र आंदोलन छेडण्यात येईल, असा इशाराही कोळी समाज बहुउद्देशीय प्रतिष्ठानने दिला आहे.
