यावल-लाईव्ह ट्रेंड्स न्यूज प्रतिनिधी । यावल शहरात गेल्या काही दिवसांपासून चोरीच्या घटनांमध्ये वाढ होत असून, शुक्रवारी दुपारच्या सुमारास शहरातील विस्तारित वसाहतीतील आयशा नगर परिसरात दिवसाढवळ्या घरफोडीची घटना घडली. अज्ञात चोरट्यांनी बंद घराचे कुलूप तोडून घरातील सोन्याचे दागिने आणि रोकड लंपास केल्याने परिसरात खळबळ उडाली आहे.
मिळालेल्या माहितीनुसार, आयशा नगर परिसरात राहणारे आरोग्य कर्मचारी अब्दुल रज्जाक सत्तार देशपांडे हे आपल्या कुटुंबासह वास्तव्यास आहेत. दिनांक १६ मे रोजी दुपारी त्यांच्या पत्नी जवळच असलेल्या वाड्यात लग्न समारंभासाठी जेवणास गेल्या होत्या. यावेळी घर बंद असल्याची संधी साधून अज्ञात चोरट्यांनी घराच्या मुख्य दरवाजाचे कुलूप तोडून आत प्रवेश केला.
चोरट्यांनी घरातील मागील खोलीतील कपाट उघडून त्यामध्ये ठेवलेले सोन्याचे दागिने तसेच काही रोकड रक्कम चोरून नेली. चोरीची माहिती मिळताच यावल पोलिसांनी घटनास्थळी धाव घेत पंचनामा केला.
घरमालक रज्जाक देशपांडे हे बाहेरगावी गेले असल्याने ते परत आल्यानंतर त्यांनी यावल पोलीस ठाण्यात अज्ञात चोरट्यांविरोधात तक्रार दाखल केली. या प्रकरणाचा पुढील तपास पोलीस निरीक्षक रंगनाथ धारबळे यांच्या मार्गदर्शनाखाली सुरू आहे. दरम्यान, शहरात वाढत्या चोरीच्या घटनांमुळे नागरिकांमध्ये भीतीचे वातावरण निर्माण झाले असून पोलिसांनी गस्त वाढविण्याची मागणी नागरिकांकडून होत आहे.
