मुंबई-लाईव्ह ट्रेंडस न्यूज वृत्तसेवा | रायगडावरील वाघ्या श्वानाच्या प्रतिकृतीबाबत वाद पुन्हा उफाळला आहे. माजी खासदार संभाजीराजे भोसले यांनी वाघ्या कुत्र्याच्या अस्तित्वाला कोणतेही ऐतिहासिक पुरावे नाहीत, असा दावा करत ही प्रतिकृती हटवावी, अशी मागणी केली आहे.
संभाजीराजेंनी मुख्यमंत्री देवेंद्र फडणवीस यांना पत्र पाठवून यासंदर्भात स्पष्ट भूमिका मांडली आहे. ऐतिहासिक दृष्टिकोनातून केवळ पुराव्यांवर आधारित माहितीच गडावर असावी, असे ते म्हणाले. त्यांनी असा दावा केला की, वाघ्या कुत्र्याचा उल्लेख कोणत्याही ऐतिहासिक दस्तावेजांमध्ये आढळत नाही, त्यामुळे त्याच्या प्रतिकृतीला ऐतिहासिक स्मारक म्हणून स्थान देणे चुकीचे आहे. पत्रकार परिषदेदरम्यान त्यांनी रायगडाचे 100 वर्षांपूर्वीचे फोटो दाखवून त्या ठिकाणी वाघ्या कुत्र्याची समाधी नसल्याचे पुरावे सादर केले.
संभाजीराजे म्हणाले की, 1925 पूर्वी समाधीच्या जीर्णोद्धाराचे काम लोकमान्य टिळकांच्या नेतृत्त्वात झालेल्या समितीने केले होते. त्यावेळी सरकारने आणि शिवभक्तांनी निधी उभारून समाधीचे पुनर्निर्माण केले होते. मात्र, वाघ्या कुत्र्याच्या स्मारकाचे कोणतेही ऐतिहासिक दस्तऐवज उपलब्ध नाहीत. त्यांनी असा आरोप केला की, वाघ्या कुत्र्याची दंतकथा ‘राजसंन्यास’ नाटकातून निर्माण झाली. त्या नाटकामुळे छत्रपती संभाजी महाराजांची बदनामी झाली आणि त्याच वेळी वाघ्या कुत्र्याच्या स्मारकाचा विषय पुढे आला. त्यांनी आव्हान दिले की, इतिहासकारांनी या संदर्भात उपलब्ध पुरावे सादर करावेत आणि सरकारने खुली चर्चा आयोजित करावी.
संभाजीराजेंच्या मते, वाघ्या कुत्र्याच्या स्मारकाची उंची शिवाजी महाराजांच्या समाधीपेक्षा अधिक आहे, हे कोणत्याही शिवभक्ताला पटणारे नाही. त्यांचा मुद्दा असा आहे की, हिंदवी स्वराज्यासाठी लाखो मावळ्यांनी बलिदान दिले, पण त्यांची समाधी कुठे आहे याचा उल्लेख आढळत नाही, मात्र एका कुत्र्याचे स्मारक उभारले गेले. संभाजीराजेंनी स्पष्ट केले की, त्यांनी सरकारला कोणतेही अल्टिमेटम दिलेले नाही. मात्र, राज्य सरकारच्या गडकोटांवरील अतिक्रमण हटवण्याच्या आदेशानुसार, जर वाघ्या कुत्र्याच्या स्मारकाचा कोणताही ऐतिहासिक पुरावा नसेल, तर ते संविधानिक प्रक्रियेनुसार काढले जावे, अशी त्यांची भूमिका आहे. तसेच, गडाखाली एखाद्या ठिकाणी त्याचे स्मारक उभारण्याचा पर्यायही सुचवला आहे.
