यावल-लाईव्ह ट्रेंड्स न्यूज प्रतिनिधी । यावल येथे भारतीय जनता पक्षाचा स्थापना दिन विविध कार्यक्रमांनी उत्साहात साजरा करण्यात आला. या कार्यक्रमाला रावेर-यावल विधानसभा मतदारसंघाचे आमदार आणि भाजपचे जिल्हाध्यक्ष आ. अमोल हरिभाऊ जावळे यांची प्रमुख उपस्थिती लाभली.
स्थापना दिनानिमित्त यावल येथील सहकारी खरेदी विक्री संघाच्या सभागृहात महाराष्ट्राचे उपमुख्यमंत्री देवेंद्र फडणवीस यांच्या महाराष्ट्रातील कार्यकर्त्यांशी ऑनलाईन संवाद प्रसारण करण्यात आला. या संवादातून त्यांनी कार्यकर्त्यांना मार्गदर्शन करत पक्षाच्या मूलभूत मूल्यांवर भाष्य केले.
यावेळी आमदार अमोल जावळे यांनी उपस्थित कार्यकर्त्यांशी संवाद साधताना सांगितले की, “राष्ट्र प्रथम हेच आमचे तत्व असून, हीच आमची विचारधारा आहे. भाजप कार्यकर्त्यांनी ही तत्त्वे कायम डोळ्यासमोर ठेवून समाजसेवा करावी.”
या कार्यक्रमाला यावल तालुक्यातील जिल्हा परिषद सदस्य, पंचायत समितीचे सभापती व उपसभापती, नगरपालिका अध्यक्ष, नगरसेवक, सरपंच, कृषी उत्पन्न बाजार समितीचे पदाधिकारी, विविध गटप्रमुख, गणप्रमुख, शक्तीकेंद्रप्रमुख, बुथप्रमुख, महिला आघाडी, युवा मोर्चा, शाखाध्यक्ष आणि असंख्य सक्रीय कार्यकर्ते उपस्थित होते.
या उत्साहपूर्ण वातावरणात पक्षाच्या इतिहास, कार्यपद्धती व आगामी दिशा यावर चर्चा झाली. उपस्थित कार्यकर्त्यांनी पक्षासाठी अधिक जोमाने कार्य करण्याचा संकल्प यावेळी व्यक्त केला.
