चोपडा-लाईव्ह ट्रेंड्स न्यूज प्रतिनिधी । हिंदुहृदयसम्राट स्व. बाळासाहेब ठाकरे यांचे छायाचित्र फाडल्याच्या कथित प्रकारावरून चोपडा शहरात राजकीय वातावरण तापले आहे. शिवसेना शिंदे गटाच्या १८ नोव्हेंबर रोजी झालेल्या पत्रकार परिषदेत नेत्या शायना एनसी यांनी बाळासाहेब ठाकरे यांचे छायाचित्र फाडल्याचा आरोप करत शिवसेना (उद्धव बाळासाहेब ठाकरे) पक्षाच्या वतीने शुक्रवारी चोपडा येथे तीव्र निषेध आंदोलन करण्यात आले. शायना एनसी यांनी संपूर्ण महाराष्ट्राच्या जनतेची जाहीर माफी मागावी आणि त्यांच्याविरुद्ध तातडीने गुन्हा दाखल करून कठोर कायदेशीर कारवाई करावी, अशी मागणी आंदोलकांनी केली.
चोपडा शहरातील छत्रपती शिवाजी महाराज चौकात शिवसेना उबाठाचे पदाधिकारी आणि कार्यकर्ते मोठ्या संख्येने एकत्र आले होते. यावेळी कार्यकर्त्यांनी शायना एनसी यांच्या छायाचित्राचे प्रतीकात्मक दहन न करता ते फाडून निषेध व्यक्त केला. तसेच जोरदार घोषणाबाजी करत संबंधित प्रकाराचा तीव्र शब्दांत धिक्कार केला. या आंदोलनामुळे परिसरात राजकीय वातावरण तापले होते.

आंदोलनानंतर शिवसेना उबाठाच्या पदाधिकाऱ्यांनी तहसील कार्यालय गाठून तहसीलदार भाऊसाहेब थोरात यांची भेट घेतली. तसेच चोपडा शहर पोलीस ठाण्याचे पोलीस निरीक्षक पवन देसले यांनाही निवेदन सादर करण्यात आले. संबंधित घटनेची गंभीर दखल घेऊन शायना एनसी यांच्याविरुद्ध कायदेशीर कारवाई करण्याची मागणी या निवेदनातून करण्यात आली.
प्रसारमाध्यमांसमोर स्व. बाळासाहेब ठाकरे यांचे छायाचित्र फाडल्याचा प्रकार घडल्यामुळे राज्यातील तमाम शिवसैनिकांसह बाळासाहेबांवर प्रेम करणाऱ्या नागरिकांच्या भावना दुखावल्या गेल्याचे निवेदनात नमूद करण्यात आले आहे. बाळासाहेब ठाकरे हे महाराष्ट्राच्या राजकीय आणि सामाजिक जीवनातील महत्त्वाचे व्यक्तिमत्त्व असून त्यांच्या छायाचित्राचा अशा प्रकारे अवमान करणे निषेधार्ह असल्याची भूमिका आंदोलकांनी मांडली.
या घटनेमुळे राज्यात सामाजिक अस्वस्थता निर्माण होऊन कायदा व सुव्यवस्थेचा प्रश्न निर्माण होण्याची शक्यता असल्याचेही निवेदनात म्हटले आहे. त्यामुळे संबंधित प्रकाराची तातडीने चौकशी करून जनतेच्या भावना दुखावल्याप्रकरणी तसेच महापुरुषांचा अवमान केल्याच्या आरोपांबाबत शायना एनसी यांच्याविरुद्ध गुन्हा दाखल करावा आणि कठोर कायदेशीर कारवाई करावी, अशी मागणी करण्यात आली. याशिवाय त्यांनी संपूर्ण महाराष्ट्राच्या जनतेची जाहीर माफी मागावी, अशी भूमिका शिवसेना उबाठाच्या पदाधिकाऱ्यांनी स्पष्ट केली.
या आंदोलनात महिला आघाडीच्या रोहिणी पाटील, विधानसभा क्षेत्रप्रमुख सुनील बडगुजर, तालुकाप्रमुख देवेंद्र सोनवणे, तालुका संघटक बाळू कोळी, शहरप्रमुख शशी कन्हैया, महिला शहर संघटक जयश्री बडगुजर यांच्यासह प्रकाश पाटील, प्रवीण लोहार, चेतन राठोड, दिनकर पावरा, रवी पाटील, महारू पाटील, गणेश कन्हैया, देविदास मगरे, जानकीराम कोळी, हिरालाल पाटील, डॉ. अशोक कखरे, अविनाश पाटील, विजय पाटील, विजय बोरसे, सचिन कोळी, संदीप कोळी, सुनील पाटील, मनोज महाजन, जगन महाजन, मुकेश सोनवणे, पांडुरंग कोळी, दीपक माळी, शिवाजी मराठे, शाम मराठे, विनोद चौधरी आणि विनय पाटील यांच्यासह शिवसैनिक मोठ्या संख्येने उपस्थित होते.
बाळासाहेब ठाकरे यांच्या छायाचित्राचा कथित अवमान केल्याच्या प्रकारावरून चोपड्यात शिवसेना उबाठाने आक्रमक भूमिका घेत निषेध आंदोलन केले. शायना एनसी यांच्याविरुद्ध गुन्हा दाखल करणे आणि त्यांनी महाराष्ट्राच्या जनतेची जाहीर माफी मागणे या प्रमुख मागण्यांसाठी पक्षाने प्रशासनाकडे निवेदन सादर केले आहे.



