जळगाव प्रतिनिधी । शहरातील शिवकॉलनी स्टॉपजवळील महामार्गावर भरधाव डंपरने दुचाकीला मागून जोरदार धडक दिली. यात डंपरचे चाक डोक्यावरून गेल्या तरूणाचा मृत्यू झाला तर दुचाकीस्वार गंभीर जखमी झाला आहे. याप्रकरणी जिल्हा पेठ पोलीस ठाण्यात फरार डंपरचालकवर गुन्हा दाखल करण्यात आला आहे.
श्याम सुरेश पाटील (३७, निवृत्ती नगर) असे मयत तरूणाने नाव असून दुचाकीस्वार परेश रवींद्र पाटील (२९, संभाजी नगर) हा गंभीर जखमी झाला आहे. ही घटना मंगळवारी रात्री दहा वाजता महामार्गावरील शिव काॅलनी थांब्याजवळ घडली. सूत्रांनी दिलेल्या माहितीनुसार, परेश पाटील व श्याम पाटील दोघेही मित्र असून दूध फेडरेशनमध्ये कामाला होते. मंगळवारी रात्री परेश हा टॉवर चौकात असताना श्याम पाटील याने ‘मी जैनाबाद मध्ये आहे मला घ्यायला ये’ असे सांगून परेशला बोलावून घेतले. तेथून परेशच्या (क्रमांक एम.एच.१९ सी.टी.०५९१) या दुचाकीने श्याम याला निवृत्तीनगरात घरी सोडण्यासाठी जात असताना रात्री दहा वाजता महामार्गावर शिव कॉलनी थांब्याच्या अलीकडे एका हॉटेल जवळ मागून भरधाव वेगाने आलेल्या पिवळ्या रंगाच्या डंपरने दुचाकीला जोरदार धडक दिली. त्यात मागे बसलेला श्याम खाली फेकला गेला. त्यात श्यामच्या डोक्यावरुन टायर गेले तर परेश लांब फेकला गेला. या घटनेत श्यामचा जागीच मृत्यू झाला. तर परेशच्या उजव्या हाताला व डोक्याला मार लागला आहे. या घटनेची माहिती मिळताच श्यामचा भाऊ अजय पाटील, राहुल पाटील, महेश पाटील, हितेश भदाणे आदींनी घटनास्थळी धाव घेतली. तातडीने दोघांना जिल्हा सरकारी रुग्णालयात हलविले. तेथे श्यामला मृत घोषित करण्यात आले तर परेश याला खाजगी रुग्णालयात हलवण्यात आले. त्याच्यावर उपचार सुरु असुन त्याच्या उजव्या भुवईवर सात टाके पडले आहेत तर डोक्याला व हाताला गंभीर दुखापत झाली आहे. याप्रकरणी जिल्हापेठ पोलीसात फरार डंपरचालकाविरूध्द गुन्हा दाखल करण्यात आला आहे.
