पारोळा-लाईव्ह ट्रेंड्स न्यूज प्रतिनिधी । नगाव, ता. जि. धुळे येथील गंगामाई अभियांत्रिकी महाविद्यालयाचा विद्यार्थी हर्ष प्रकाश पाटील याने भोपाळ, मध्य प्रदेश येथे झालेल्या राष्ट्रीय नेमबाजी स्पर्धेत १० मीटर एअर रायफल प्रकारात प्रथम क्रमांक पटकावत सुवर्णपदक मिळवले. हर्षच्या या उल्लेखनीय यशाची दखल घेत राज्य पुरस्कारप्राप्त आदर्श निवृत्त शिक्षक तथा गुणग्राहक व्यक्तिमत्त्व सदानंद धडू भावसार यांनी त्याला आपल्या निवासस्थानी बोलावून विशेष सन्मान केला.
राष्ट्रीय स्तरावरील या यशामुळे हर्ष पाटीलने आपल्या कुटुंबीयांसह गंगामाई अभियांत्रिकी महाविद्यालयाचे नावही उज्ज्वल केले आहे. वृत्तपत्रातून हर्षच्या यशाची माहिती मिळाल्यानंतर भावसार सरांनी आनंद व अभिमान व्यक्त करत त्याचा गौरव करण्याचा निर्णय घेतला. त्यानुसार हर्षला आपल्या निवासस्थानी आमंत्रित करून त्याचे कौतुक करण्यात आले.
यावेळी सदानंद भावसार यांनी हर्षला अभिनंदन पत्र, गौरवपत्र तसेच रोख ५०० रुपयांचे बक्षीस देऊन त्याचा सन्मान केला. राष्ट्रीय पातळीवर मिळवलेले हे यश हर्षच्या मेहनतीचे, चिकाटीचे आणि सातत्यपूर्ण सरावाचे फलित असल्याचे सांगतानाच त्याच्या कुटुंबीयांचे, मार्गदर्शकांचे आणि महाविद्यालयाचेही या यशात महत्त्वाचे योगदान असल्याचे भावसार सरांनी नमूद केले. नेमबाजीसारख्या कौशल्य, एकाग्रता आणि सातत्याची आवश्यकता असलेल्या क्रीडा प्रकारात राष्ट्रीय स्तरावर सुवर्णपदक मिळवणे ही अभिमानाची बाब असल्याचेही त्यांनी सांगितले. हर्षने भविष्यात देशपातळीबरोबरच आंतरराष्ट्रीय स्तरावरही उत्कृष्ट कामगिरी करून आपल्या कर्तृत्वाचा ठसा उमटवावा, अशी सदिच्छा भावसार सरांनी व्यक्त केली. पुढील वाटचालीसाठी त्यांनी हर्षला शुभेच्छा देत अनेकोत्तम आशीर्वाद दिले.
या सत्काराबद्दल हर्ष पाटील आणि त्याच्या कुटुंबीयांनी सदानंद भावसार यांचे आभार मानले. विद्यार्थ्यांच्या यशाची दखल घेऊन त्यांना प्रोत्साहन देणाऱ्या भावसार सरांच्या या उपक्रमाबद्दल कुटुंबीयांनी आदर आणि कृतज्ञता व्यक्त केली. गुणवंत, होतकरू आणि विविध क्षेत्रांत उल्लेखनीय कामगिरी करणाऱ्या विद्यार्थ्यांचा शोध घेऊन त्यांचा गौरव करण्याची सदानंद भावसार यांची परंपरा परिसरात विशेष कौतुकाचा विषय ठरली आहे. आतापर्यंत त्यांनी तब्बल १ हजार ११३ यशस्वी विद्यार्थ्यांचा गौरव केला आहे. शिक्षण, क्रीडा, कला, सामाजिक कार्य, स्पर्धा परीक्षा तसेच विविध क्षेत्रांत उल्लेखनीय कामगिरी करणाऱ्या विद्यार्थ्यांना ते सातत्याने प्रोत्साहन देत आहेत.
विद्यार्थ्यांच्या पाठीवर कौतुकाची थाप देऊन त्यांच्या गुणवत्तेला प्रोत्साहन देण्याचे भावसार सरांचे कार्य नव्या पिढीसाठी प्रेरणादायी ठरत आहे. ‘गुणवंतांचा गौरव आणि गुणवत्तेला प्रोत्साहन’ या भावनेतून सुरू असलेल्या त्यांच्या उपक्रमामुळे विद्यार्थ्यांमध्ये आत्मविश्वास निर्माण होण्यास मदत होत असून, समाजात सकारात्मक संदेशही दिला जात आहे. हर्ष पाटीलच्या राष्ट्रीय सुवर्णपदकाच्या निमित्ताने भावसार सरांच्या या गौरवपरंपरेचे पुन्हा एकदा दर्शन घडले. हर्षच्या यशाबद्दल शहर व तालुक्यातील विविध क्षेत्रांतील मान्यवरांनी आनंद व्यक्त करून त्याचे अभिनंदन केले. तसेच गुणवंत विद्यार्थ्यांना प्रोत्साहन देत आतापर्यंत १ हजार ११३ विद्यार्थ्यांचा गौरव करणाऱ्या सदानंद भावसार यांच्या कार्याचेही कौतुक करण्यात आले.
