सावदा, ता. रावेर -लाईव्ह ट्रेंड्स न्यूज प्रतिनिधी । येथील ऐतिहासिक श्री स्वामिनारायण मंदिराचा ११२ वा वर्धापन दिन आज अत्यंत भक्तिमय आणि उत्साहपूर्ण वातावरणात साजरा करण्यात आला. या पावन सोहळ्याला संतवृंद, मान्यवर यजमान, हरिभक्तगण आणि भाविकांची मोठ्या संख्येने उपस्थिती लाभली. मंदिराच्या दीर्घ आध्यात्मिक परंपरेचा गौरव करत भक्तांनी श्रद्धा, सेवा आणि सत्संगाच्या मार्गावर आयुष्यभर चालण्याचा संकल्प केला. श्री स्वामिनारायण मंदिर, सावदा येथील पुजारी शास्त्री स्वामी भक्तीप्रियदासजी यांच्या मार्गदर्शनाखाली विविध धार्मिक कार्यक्रम पार पडले.
वर्धापन दिनाच्या निमित्ताने उपस्थितांना मार्गदर्शन करताना संतांनी मानव जीवनाचे महत्त्व स्पष्ट केले. भगवानाने दिलेला मानवजन्म हा केवळ भौतिक सुख-सुविधा मिळवण्यासाठी नसून परमेश्वरप्राप्तीसाठी असल्याचे त्यांनी सांगितले. आजच्या धावपळीच्या आणि आकर्षणांनी भरलेल्या जीवनात अनेक गोष्टी मनुष्याला आपल्या ध्येयापासून दूर नेतात, मात्र सत्संग हा जीवनाला योग्य दिशा देणारा प्रकाश आहे, असे प्रतिपादन करण्यात आले.
यावेळी युवकांनी मंदिराशी जोडले गेले पाहिजे, लहान मुलांनी बालसभांमध्ये सहभागी होऊन संस्कार आत्मसात केले पाहिजेत आणि प्रत्येक घरात नियमित प्रार्थना व भगवानाचे स्मरण झाले पाहिजे, असे आवाहन करण्यात आले. सत्संगाच्या माध्यमातून जीवनात सकारात्मक बदल घडतो आणि व्यक्तिमत्त्वाचा विकास होतो, यावरही भर देण्यात आला. वर्धापन दिनाच्या प्रसंगी भाविकांना पाच महत्त्वपूर्ण संकल्प करण्याचे आवाहन करण्यात आले. दररोज प्रार्थना करणे, भगवानाचे स्मरण करणे, आठवड्यातून किमान एकदा मंदिरात दर्शनासाठी येणे, संतांच्या आज्ञेचे पालन करणे आणि आपल्या मुलांना सत्संगाशी जोडणे, हे संकल्प प्रत्येकाने जीवनात अंगीकारावेत, असे सांगण्यात आले.
श्री स्वामिनारायण मंदिर हे केवळ दगडांनी उभारलेली वास्तू नसून हजारो भक्तांच्या श्रद्धेने, संतांच्या तपश्चर्येने आणि पूर्वजांच्या त्यागातून निर्माण झालेले पवित्र श्रद्धास्थान आहे. मंदिराची खरी भव्यता त्याच्या वास्तूमध्ये नसून तेथील भक्ती, संस्कार आणि सत्संगाची परंपरा जिवंत ठेवण्यात असल्याचे यावेळी सांगण्यात आले. ११२ वर्षांचा हा प्रवास म्हणजे चार-पाच पिढ्यांच्या श्रद्धा, सेवा आणि समर्पणाचा इतिहास आहे. या कालखंडात अनेक संतांचे मार्गदर्शन लाभले, असंख्य हरिभक्तांनी सेवा केली आणि विविध धार्मिक उत्सवांच्या माध्यमातून भक्तीची परंपरा अखंड सुरू ठेवली. मंदिराची दिव्यता आणि आध्यात्मिक वातावरण आजही कायम राहण्याचे श्रेय पूर्वज, संत आणि सेवाभावी भक्तांना जाते.
मंदिराच्या उभारणीसाठी आणि धार्मिक परंपरा जतन करण्यासाठी योगदान देणाऱ्या सर्व ज्ञात-अज्ञात सेवकांप्रती यावेळी कृतज्ञता व्यक्त करण्यात आली. त्यांच्या त्यागामुळेच आजच्या पिढीला या पवित्र मंदिरातून भक्ती, संस्कार आणि अध्यात्माचा अनुभव घेता येत असल्याचे सांगण्यात आले. भगवान स्वामिनारायणांच्या शिकवणीनुसार मंदिर हे समाजाला दिशा देणारे आध्यात्मिक विद्यापीठ आहे. मंदिरातून लहान मुलांना संस्कार मिळतात, युवकांना जीवनाचा योग्य मार्ग मिळतो आणि ज्येष्ठांना आत्मिक समाधान प्राप्त होते. त्यामुळे मंदिरात येणे ही केवळ परंपरा न राहता जीवनशैली बनली पाहिजे, असे आवाहन करण्यात आले.
यावेळी नियमित दर्शन, सभा आणि सेवाकार्याच्या माध्यमातून सत्संगाची परंपरा पुढील पिढीपर्यंत पोहोचवण्याचा संकल्प भाविकांनी केला. तसेच वर्धापन दिनाचा उत्सव यशस्वी करण्यासाठी तन, मन आणि धनाने योगदान देणाऱ्या सर्व यजमान, सेवक, दाते आणि हरिभक्तांचे मनःपूर्वक आभार मानण्यात आले. कार्यक्रमाच्या शेवटी श्री स्वामिनारायण भगवानाकडे मंदिरावर सदैव कृपादृष्टी राहावी, हे स्थान भक्ती, सेवा, सत्संग आणि संस्कारांचे केंद्र म्हणून कायम राहावे, अशी प्रार्थना करण्यात आली. “दगडांचे मंदिर उभे राहण्यासाठी वर्षे लागतात, पण भक्तीचे मंदिर उभे राहण्यासाठी आयुष्य घालवावे लागते,” या संदेशातून भक्ती आणि सेवाभावाचे महत्त्व अधोरेखित करण्यात आले.
